كوروناۆيرۋستىڭ بارىنا كۇمان كەلتىرگەندەر كوشەدە قىدىرىپ ءجۇر - ءومىرزاق شوكەيەۆ
بۇل تۋرالى تۇركىستان وبلىسىنىڭ اكىمى ءومىرزاق شوكەيەۆ ونلاين- بريفينگتە مالىمدەدى، دەپ حابارلايدى قازاقپارات ءتىلشىسى.
ايماق باسشىسىنىڭ سوزىنشە، دارىگەرلەر قاۋىمى كۇن- ءتۇن دەمەي ۆيرۋستى جەڭۋ جولىندا ەڭبەك ەتۋدە.
«وبلىس اۋماعىندا دا 300-دەن اسا ادام اۋىرىپ، دارىگەرلەردىڭ ارقاسىندا 180-گە جۋىق ناۋقاس دەرتىنەن جازىلىپ وتباسىنا ورالدى. وكىنىشكە قاراي، COVID-19 ينفەكسياسىنىڭ بارىنا كۇمان كەلتىرەتىن ادامدار كوشەدە قىدىرىپ، تۋعان- تۋىسىنىڭ ۇيىنە بارۋدا. بالالار اۋلالاردا بىرگە ويناپ، ءبىر- بىرىمەن تىعىز بايلانىستا ءجۇر. بۇل دۇرىس ەمەس. اتالعان ۆيرۋس قازىر وبلىس كولەمىندە، ءار اۋداندا كەڭىنەن تاراپ بارادى. الدىن الماساق، سالدارى جامان بولماق. بالالارعا جۇققان اۋرۋ ونىڭ بويىندا بىلىنبەگەنمەن، ۇلكەن قاريالارعا جۇقسا، ولارعا وتە اۋىر تيەدى. وتباسىمىزدىڭ، تۋعان- تۋىستىڭ، اتا- انامىزدىڭ اماندىعىن ويلاساق ءالى دە كارانتين رەجيمىن ساقتاۋىمىز قاجەت. كارانتين تالاپتارىن ساقتاماعاندارعا ايىپپۇل سالىنادى. قۇقىق قورعاۋ ورگاندارىنا ارنايى جينالىس جاساپ، تاپسىردىم. زاڭعا باعىنباعان كاسىپكەرلەرگە جازا قولدانۋ كەرەك»، دەدى ءومىرزاق شوكەيەۆ.
اتاپ وتەيىك، سوڭعى اقپاراتقا سايكەس، وبلىستا كوروناۆيرۋستىق ينفەكسيانىڭ راستالعان 337 جاعدايى تىركەلگەن. ونىڭ ىشىندە 187 ادام قازىرگى تاڭدا اۋرۋىنان ايىعىپ، ۇيلەرىنە ورالعان.
اۆتور: اينۇر اقبايەۆا