ماقتاارالدا وزبەكستاندىق تەحنيكامەن شيت سەۋىپ جاتىر

ماقتاارال. قازاقپارات - ماقتاارال اۋدانىنداعى سۋ باسقان ەگىستىك القاپتاردى قايتا قالپىنا كەلتىرىپ، ءشيتتى ماقتا ەگۋ جۇمىستارى باستالدى.

وسى ماقساتتا اۋدانعا وزبەكستان رەسپۋبليكاسىنىڭ جىزاق جانە سىرداريا وبلىستارىنان 40 ارنايى تەحنيكا مەن 243,6 توننا ماقتا ءشيتى جەتكىزىلدى، دەپ حابارلايدى قازاقپارات ءتىلشىسى.

كورشى ەلدەن كەلگەن تەحنيكانىڭ 15- ءى چيزەل اگرەگاتى بولسا، 11- جۇيەكارالىق قوپسىتقىش جانە 14 ءى ءدان سەپكىش تراكتورلارى. وسىلايشا شەكارالى اۋدان اۋماعىنا جەتكىزىلگەن ماماندار مەن تەحنيكالار قازىرگى ۋاقىتتا سۋى تارتىلعان ەلدى مەكەندەردەگى شارۋالارعا كومەكتەسىپ، ماقتا داقىلىن قايتا ەگىپ بەرىپ جاتىر. ماسەلەن، ج. نۇرلىبايەۆ اۋىلدىق وكرۋگىنە قاراستى قاراقىر ەلدى مەكەنىندەگى «جامانقۇل» شارۋا قوجالىعى وزبەكستاندىق تەحنيكانىڭ ارقاسىندا 7 گەكتار القابىنا ماقتا ءشيتىن قايتا سەۋىپ شىقتى.

«وزبەكستاندىق تەحنيكانىڭ كومەگىمەن توپان سۋ باسقان 7 گەكتار القابىما ماقتا ءدانىن قايتا سەۋىپ الدىم. كورشى اعايىندار تەحنيكادان بولەك، جانار- جاعارمايىن، سۇرىپتى ءشيتىن دە تەگىن بەرىپ وتىر. بۇل شىعىنعا ۇشىراعان ءبىز سەكىلدى ديقاندارعا ۇلكەن كومەك ەكەنى ءسوزسىز»، - دەيدى «جامانقۇل» شارۋا قوجالىعىنىڭ مۇشەسى جاندوس ساپارحان.

ايتا كەتەيىك، جالپى توپان سۋدان ماقتاارال اۋدانىنداعى 7 مىڭ 500 گەكتار ەگىستىك القاپ زارداپ شەككەن بولاتىن. سونىڭ 5035 گەكتارى جاڭاجول اۋىلى وكرۋگىنە تيەسىلى. وزبەكستاندىق تەحنيكالاردىڭ باسىم كوپشىلىگى دە وسى اۋىل وكرۋگىنە ءبولىنىپ وتىر. بۇدان بولەك، ەڭبەكشى اۋىلدىق وكرۋگىنە قاراستى جاڭا تۇرمىس جانە جانتاقساي ەلدى مەكەنىندەرىندەگى جالپى اۋماعى 113,31 گەكتار ەگىستىك القاپتى قايتا وڭدەۋ جۇمىستارىنا دا وزبەكستاندىق تەحنيكالار ءبولىندى. سونىمەن قاتار، ج. نۇرلىبايەۆ اۋىلدىق وكرۋگىنە قاراستى قاراقىر ەلدى مەكەنىندە 61,8 گەكتار ەگىستىككە قايتارا ماقتا ءدانىن سەبۋ جۇمىستارى جۇرگىزىلۋدە.

«كورشى مەملەكەتتەن كەلگەن تەحنيكالارعا دەگەن سۇرانىس كۇن ساناپ ارتىپ وتىر. ويتكەنى شارۋالار سۋ شايعان القاپتارىنا مامىر ايىنىڭ سوڭعى كۇندەرىنە دەيىن ماقتا ەگۋگە بولاتىنىن جاقسى بىلەدى. سوندىقتان ولار كۇندىز- ءتۇنى تىنباي ەگىستىك القاپتارىن قايتا قالپىنا كەلتىرۋ جۇمىستارىنا جۇمىلۋدا. ءبىر تاۋلىكتە شامامەن 100 گەكتاردان استام القاپقا كۇلتە جۇرگىزىلىپ، 100 گەكتارعا ماقتا ەگىلۋدە»، - دەيدى اۋداندىق اۋىل شارۋاشىلىعى ءبولىمىنىڭ مامانى جارقىنبەك مىرزاليەۆ.

اۆتور: اينۇر اقبايەۆا