جاستاردى عىلىمعا قالاي تارتۋعا بولادى: تولەۋتاي راحىمبەكوۆتىڭ ۇسىنىسى

نۇر-سۇلتان. قازاقپارات - ۇلتتىق قوعامدىق سەنىم كەڭەسىنىڭ مۇشەسى تولەۋتاي راحىمبەكوۆ جاستاردى عىلىمعا تارتۋدىڭ بىرنەشە جولىن ۇسىندى، دەپ حابارلايى قازاقپارات ءتىلشىسى.

«عىلىمي كادرلاردىڭ سانىن كوبەيتۋ ماسەلەسى دە وتە وزەكتى. سوڭعى 30 جىلدا 1 ميلليون تۇرعىنعا شاققاندا رەسپۋبليكادا عىلىمي كادرلاردىڭ سانى ەكى جارىم ەسە ازايعان. بۇل كورسەتكىش بويىنشا ت م د- داعى سەرىكتەستەردىڭ وزىنەن 1,5-2 ەسە ارتتا قالىپ وتىرمىز»، - دەدى تولەۋتاي راحىمبەكوۆ ۇلتتىق قوعامدىق سەنىم كەڭەسىنىڭ كەزەكتى وتىرىسىندا.

ۇلتتىق كەڭەس مۇشەسى عالىم بولۋدىڭ جاستار اراسىندا تارتىمدىلىعىن ارتتىرۋ ءۇشىن مىناداي امالداردى ۇسىندى.

«بىرىنشىدەن، مەملەكەتتىك تاپسىرىس اياسىندا ماگيسترانتتار مەن دوكتورانتتار ءۇشىن وقۋ قۇنى مەن شاكىرتاقى مولشەرىن ارتتىرۋ مۇمكىندىگىن قاراستىرۋ قاجەت. بۇعان ءتىپتى، مەملەكەتتىك تاپسىرىس اياسىنداعى ولاردىڭ سانىن ازايتۋ ارقىلى دا قول جەتكىزۋگە بولادى.

ەكىنشىدەن، «بولاشاق» باعدارلاماسى بويىنشا ەڭ جاقسى شەتەلدىك عىلىمي ورتالىقتاردا عالىمدارعا ستاجيروۆكادان ءوتۋ شارالارىن قاراستىرۋ كەرەك. ۇشىنشىدەن، عىلىمي مەكەمەلەردى بازالىق قارجىلاندىرۋ كولەمىن ۇلعايتقان ابزال. تورتىنشىدەن، عىلىمي جابدىق، يمپورتتىڭ سالىقتىق جانە كەدەندىك ىنتالاندىرۋ ماسەلەسىن شەشكەن دۇرىس»، - دەدى ول.