پرەزيدەنت عىلىمنىڭ قانداي باعىتتارى قارجىلاندىرىلاتىنىن ايتتى
بۇل تۋرالى ۇلتتىق قوعامدىق سەنىم كەڭەسىنىڭ 3-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«تولىقتاي العاندا، عىلىمدى قارجىلاندىرۋدى كەزەڭ-كەزەڭىمەن ۇلعايتامىز جانە 2025 -جىلعا قاراي ونى جالپى ىشكى ءونىمنىڭ 1 پايىزىنا جەتكىزەمىز. بۇل رەتتە، ءبىز ەشكىم وقىمايتىن قاجەتسىز جۇمىستار مەن زەرتتەۋلەردى قارجىلاندىرا المايمىز. ءاربىر عىلىمي جۇمىستان سۇرانىس جانە ناقتى الەۋمەتتىك- ەكونوميكالىق ءارى وندىرىستىك-تەحنيكالىق قايتارىم بولۋى ءتيىس»، - دەدى مەملەكەت باسشىسى.
ق ر پرەزيدەنتىنىڭ اتاپ وتۋىنشە، باعدارلامالىق- ماقساتتى قارجىلاندىرۋ ۇلتتىق عىلىمي- تەحنيكالىق مىندەتتەر نەگىزىندە عانا ءبولىنۋى قاجەت.
«كۇش- جىگەردى جانە رەسۋرستاردى مەديتسينالىق- بيولوگيالىق زەرتتەۋ، اگروونەركاسىپتىك عىلىم، جاسىل تەحنولوگيا، جاساندى ينتەللەكت، ەنەرگيا ۇنەمدەۋ سىندى سالالارعا باعىتتاعان ءجون»، - دەپ اتاپ ءوتتى قاسىم-جومارت توقايەۆ.
مەملەكەت باسشىسى بىررەتتىك گرانتتىق كونكۋرستار ناتيجەسىنە قاراماستان ۇزدىكسىز جۇزەگە اسىرىلۋى ءتيىستى ىرگەلى زەرتتەۋلەر جۇرگىزۋمەن اينالىساتىن عىلىمي ۇيىمداردى تىكەلەي قولداۋ ماڭىزدى ەكەندىگىن باسا ايتتى.
«ۇكىمەت ىرگەلى عىلىم مەن زەرتتەۋ ينستيتۋتتارىنىڭ بازالىق قارجىلاندىرۋ كولەمىن ارتتىرۋ مۇمكىندىگىن قاراستىرۋى قاجەت»، - دەدى پرەزيدەنت.