قازاقستاندا بالانى مەكتەپكە دەيىن دامىتۋدىڭ تولىققاندى مودەلى ازىرلەنەدى

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ ۇكىمەتكە جىل سوڭىنا دەيىن بالانى مەكتەپكە دەيىن دامىتۋدىڭ تولىققاندى مودەلى ازىرلەۋدى جۇكتەدى، دەپ حابارلايدى قازاقپارات ءتىلشىسى.

«مۇعالىم ماماندىعىنىڭ ماڭىزى ەرەكشە. سول سەبەپتى ولاردى ەرەكشە جاعداي جاسايتىن ج و و-لار دايىنداۋى كەرەك. ءبىلىم سالاسىن قارجىلاندىرۋ جانە باسقارۋ جۇيەسىن جەتىلدىرۋ تالاپ ەتىلەدى. ءبىلىم سالاسىنىڭ بارلىق ساتىسىن باسقارۋدى جاڭعىرتۋ كەرەك. باسقارۋدىڭ كوللەگيالىق باسقارۋ جۇيەسىن، باقىلاۋشى جانە قامقورشىلىق كەڭەسىن قۇرۋ قاجەت. بالانى جاستان جەتىلدىرۋ جۇيەسى دە حالىقارالىق ستاندارتتارعا ساي كەلمەيدى. ءبىز مەكتەپكە دەيىنگى ءبىلىم بەرۋ سالاسىن بەلسەندى تۇردە جەتىلدىرىپ، مەكتەپ باعدارلاماسىمەن ساباقتاستىرا ءبىلۋىمىز كەرەك. جۋىق ارادا 3-6 جاس ارالىعىنداعى بالالاردى مەكتەپكە دەيىنگى تاربيەمەن جانە بىلىممەن قامتۋ دەڭگەيى 100 پايىزعا جەتەتىن بولادى»، - دەدى پرەزيدەنت ۇلتتىق قوعامدىق سەنىم كەڭەسىنىڭ وتىرىسىندا.

ايتسە دە مەملەكەت باسشىسى بالانى مەكتەپكە دەيىن دامىتۋدىڭ تولىققاندى مودەلى جوقتىعىنا نازار اۋداردى.

«ۇكىمەت ونى جىلدىڭ سوڭىنا دەيىن ازىرلەۋى كەرەك. ءبىز سونىمەن قاتار بالالاردى قوسىمشا بىلىممەن بارىنشا قامتۋىمىز كەرەك. ءبىزدىڭ بالالاردىڭ سپورتتىق، ينتەللەكتۋالدىق، شىعارماشىلىق قىرىن اشۋدا وتە ماڭىزدى. بۇل ماقساتتا جەكە باستاماشىلىقتى قولداۋ كەرەك. مەملەكەتتىك تاپسىرىس قوسىمشا ءبىلىم بەرۋدىڭ جەكە ۇيىمدارىنا بارىنشا ءتيىمدى جاعدايدا بەرىلۋى ءتيىس. اسىرەسە بۇل اۋىلدار مەن شاعىن، مونوقالالار ءۇشىن ماڭىزدى»، - دەدى ول.