ارمەنيادا كوروناۆيرۋستىڭ ەكىنشى تولقىنى باستالعانى ايتىلدى

ەرەۆان. قازاقپارات - ارمەنيادا وتە قيىن جاعداي قالىپتاستى، ءبىز كوروناۆيرۋستىڭ ەكىنشى تولقىنىمەن بەتپە- بەت كەلىپ وتىرعانىمىزدى ايتا الامىز.

بۇل تۋرالى بريفينگ بارىسىندا ارمەنيا پرەمەر- ءمينيسترى نيكول پاشينيان مالىمدەدى، دەپ حابارلايدى «قازاقپارات» ح ا ا مەنشىكتى ءتىلشىسى.

«شىن مانىسىندە، كوروناۆيرۋستىڭ ەكىنشى تولقىنىمەن بەتپە- بەت كەلىپ وتىرعانىمىزدى ايتا الامىز. بىرنەشە كۇن بويى كومەنداتۋرامەن بەكىتىلگەن ەرەجەلەر قالىپتاسقان احۋالعا قانشالىقتى سايكەس كەلەتىنىن جانە ولاردىڭ امبەباپتىلىعىن تالقىلاپ كەلەمىز. پىكىرتالاستارىمىزدىڭ ءتۇيىنى ءبىر - قابىلدانعان شەكتەۋلەر جاعدايعا سايكەس كەلەدى جانە مازمۇنى جاعىنان ءتيىمدى. ءبىزدىڭ تالقىلاۋلارىمىزدىڭ قورىتىندىسى ءبىر ءماندى: قابىلدانعان شەكتەۋلەر جاعدايعا سايكەس كەلەدى جانە ولاردىڭ مازمۇنى جاعىنان دا ءتيىمدى. وكىنىشكە وراي، وسى ەرەجەلەردى ساقتاۋدا پروبلەمالار بار»، - دەپ اتاپ ءوتتى بريفينگ بارىسىندا نيكول پاشينيان.

وسىعان بايلانىستى، پرەمەر- ءمينيستردىڭ ايتۋىنشا، ارمەنيادا كومەنداتۋرا بەلگىلەگەن ەرەجەلەردى ساقتاۋ بويىنشا اكىمشىلىك شارالار كۇشەيتىلەدى. ءوز كەزەگىندە ۆيتسە- پرەمەر، ت ج رەجيمى كەزىندەگى كومەندانت تيگران اۆينيان ازاماتتارعا ەپيدەمياعا قارسى نورمالاردى قاتاڭ ساقتاۋ قاجەتتىگى تۋرالى ەسكە سالدى. ارمەنيا دەنساۋلىق ساقتاۋ مينيسترلىگى اۋرۋدى باقىلاۋ جانە الددىن الۋ جونىندەگى ۇلتتىق ورتالىقتىڭ مالىمەتىنشە، 26 - مامىرعا دەيىن ەلدە كوروناۆيرۋس ينفەكتسياسىن جۇقتىرعان 7402 جاعداي تىركەلگەن، ولاردىڭ 3220 سى ساۋىعىپ شىقتى. 4052 پاتسيەنت ەم قابىلداۋدا. 91 ناۋقاس قايتىس بولدى.

ەسكە سالا كەتەيىك، كوروناۆيرۋس ينفەكتسياسىنا بايلانىستى ارمەنيادا 16- ناۋرىزدان باستاپ ت ج رەجيمى ەنگىزىلگەن بولاتىن. كەيىن ت ج رەجيمى 13 ماۋسىمعا دەيىن ۇزارتىلدى. 25 - مامىردان باستاپ حالىق ماسكا تاعىپ ءجۇرۋ رەجيمىنە كوشتى. تەك جابىق ورىنداردا عانا ەمەس، اشىق جانە قوعامدىق جەرلەردە ماسكا تاعۋ مىندەتتەلدى.