ەلجان ءبىرتانوۆ كوروناۆيرۋس ءورشي تۇسكەن وڭىرلەردى اتادى

نۇر- سۇلتان. قازاقپارات - ەلىمىزدىڭ ءبىرقاتار وڭىرىندە كوروناۆيرۋس ينفەكتسياسى ءورشي ءتۇستى. بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.

«سوڭعى 2 اپتانىڭ جاعدايىن قاراساق، شىنىمەن دە ءوسىم دەڭگەيى بايقالۋدا. وتكەن 2 اپتانىڭ ىشىندە كۇندەلىكتى ءوسىم دەڭگەيى 5 پايىزدان اسپادى. سوعان قاراماستان، كەيبىر وڭىرلەردە كوروناۆيرۋسپەن تىركەلگەن ناۋقاستاردىڭ سانى ارتتى. مىسالى، اتىراۋ، قاراعاندى، الماتى، جامبىل، قوستاناي، تۇركىستان، باتىس قازاقستان وبلىستارى مەن شىمكەنت قالاسىندا بايقالدى. وسى وڭىرلەردە كوروناۆيرۋستى جۇقتىرۋدىڭ ءوسىمى بىرىنشىدەن، وكىنىشكە وراي، ۇلكەن كاسپورىنداردا تىركەلىپ وتىر»،- دەدى مينيستر ورتالىق كوممۋنيكاتسيالار قىزمەتىندەگى بريفينگ بارىسىندا.

مىسالى، ونىڭ دەرەگىنشە، اتىراۋ وبلىسىندا تەڭىز كەنىشىندە - 1063 ناۋقاس، قاراعاندى وبلىسىندا - 358 ناۋقاس، ال شىمكەنت قالاسىنداعى «پەتروقازاقستان» ۇيىمىندا – 2019، نۇر- سۇلتان مەن تۇركىستان قالاسىنداعى قۇرىلىس كاسىپورىندارىندا 80-نەن استام ناۋقاس تىركەلگەن.

«سونىمەن قاتار الماتى مەن جامبىل وبلىستارىنداعى اسكەري ۇيىمداردىڭ ىشىندە دە كوپ ناۋقاس تىركەلدى. سەبەبى دە بەلگىلى. كارانتين كەزىندە ءبىز، جالپى حالىق ۇيدە وتىرعان كەزدە كەيبىر جۇمىسشىلار، مىسالى مەديتسينا قىزمەتكەرلەرى، اسكەري ادامدار جانە جۇمىسى توقتاتىلمايتىن كاسىپورىنداردىڭ ماماندارى جۇمىس ىستەدى. ينفەكتسيانىڭ تارالۋى تاۋەكەلى جوعارى بولدى جانە وسىنداي جاعداي تىركەلىپ وتىر»،- دەدى ەلجان ءبىرتانوۆ.