ورالدا كوروناۆيرۋس ءورشىپ كەتتى- اكىم ۇندەۋ جاسادى
اكىمنىڭ ءمالىم ەتكەنىندەي، توتەنشە جاعداي كەزىندە وبلىستا كوروناۆيرۋستىڭ الدىن الۋ جانە ونى تاراتپاۋ بويىنشا اۋقىمدى جۇمىستار جۇرگىزىلدى. ايماقتا كارانتين رەجيمى ساقتالعانىمەن، كەيبىر ازاماتتار ءوز قاۋىپسىزدىگىنىڭ قاراپايىم تالاپتارىن ساقتاماي ءجۇر. سونىڭ سالدارىنان 11-25 -مامىر ارالىعىندا وبلىستا COVID-19 اۋرۋىن جۇقتىرۋ %70 عا ءوستى. 26 -مامىردا وبلىس بويىنشا جۇقتىرعاندار سانى 467 گە جەتتى. ەگەر بۇرىن اۋرۋدىڭ ءوسىمى رەسەي فەدەراتسياسى مەن اتىراۋ وبلىسىنان كەلگەن ادامدار ەسەبىنەن بولعان بولسا، بۇگىندە ىندەتتىڭ وبلىس ىشىندە ءوسىمى بايقالادى. سونىمەن قاتار ورال قالاسى مەن اۋدانداردا كارانتيندىك رەجيم تالاپتارى ساقتالماي وتىر.
ءبىرىنشى كەزەكتە تۇرعىندار ماسكا كيۋ، الەۋمەتتىك قاشىقتىقتى ساقتاۋ سياقتى قاراپايىم تالاپتاردى ورىنداماي ءجۇر. ءبىر- بىرىنە قوناققا بارۋ سياقتى قۇقىقبۇزۋشىلىق فاكتىلەرى دە بار. سونىڭ كەسىرىنەن وبلىستىڭ سەگىز بىردەي اۋدانىندا 37 اۋرۋ وشاعى پايدا بولدى. بۇگىنگى تاڭدا ايماقتا اۋرۋ جۇقتىرعان ادامداردى انىقتاۋ ءۇشىن جاپپاي ارنايى تەستىلەۋ وتكىزىلۋدە. كۇنىنە ورتاشا ەسەپپەن 600-700 ادام تەست تاپسىرۋدا. ولاردىڭ اراسىندا ينفەكتسيانى جۇقتىرعاندار دا كەزدەسەدى. بۇل - ينفەكتسيانىڭ وبلىس اۋماعىندا كەڭ اۋقىمدا تاراعانىنىڭ بەلگىسى. كوبىندە ادامداردا كوروناۆيرۋس جۇقپاسى ايقىن اۋرۋ بەلگىلەرىسىز وتۋدە. اۋرۋدىڭ ايقىن بەلگىلەرى بولماۋىنىڭ قاۋىپتىلىگى - جۇقتىرعان ادام - ينفەكتسيا كوزى بولىپ تابىلادى. ينفەكتسيا جۇقتىرعان ادام اۋرۋ تۋرالى بىلمەي، باسقالارعا جۇقتىرۋى مۇمكىن.
بۇرىن تەك جاسى ۇلكەن ادامدار عانا ينفەكتسيا جۇقتىرۋ قاۋپى جوعارى دەگەن قاتە تۇسىنىك قالىپتاسقان ەدى. بۇل تەرىس پىكىر. بۇگىندە اتالعان اۋرۋ جاس تاڭدامايتىنىنا كوز جەتىپ وتىر. بۇگىنگى تاڭدا وبلىستا تىركەلگەن 467 ناۋقاستىڭ 21 ءى ون ءتورت جاسقا دەيىنگى بالالار بولسا، ال قالعان باسىم بولىگى - 50 جاسقا دەيىنگى ازاماتتار. سوندىقتان جاسى مەن دەنساۋلىعىنا قاراماستان بۇل اۋرۋدان تونەتىن ء!قاۋىپ بارلىعىنا بىردەي. كەيبىر ازاماتتار كوروناۆيرۋس بار ەكەنىنە سەنبەي ءجۇر. بۇل مۇلدەم دۇرىس ەمەس. ۆيرۋستىڭ قاۋىپتىلىگى - ونىڭ كەيبىر ادام اعزاسىنا وتە تەز اسەر ەتۋىندە. مىسالى، تەڭىز كەڭ ورنىندا قىزمەت ەتكەن ازامات 2 كۇننىڭ ىشىندە رەانيماتسياعا ءتۇستى. دارىگەرلەر ەڭبەگىنىڭ ارقاسىندا ول ءولىم اۋىزىنان قۇتقارىلدى. سوندىقتان كوروناۆيرۋستىق ينفەكتسيانىڭ بەلگىلەرى انىقتالسا، تەز ارادا جەدەل جاردەمگە حابارلاسۋ قاجەت. وزدىگىنەن ەمدەلۋگە بولمايدى.
«ۆيرۋستىڭ كوبەيۋىنە بايلانىستى ءبىز كوپتەگەن بيزنەس نىسانداردى، بالاباقشالاردى، باسقا دا ويىن- ساۋىق ورىندارىن اشا الماي وتىرمىز. سونىڭ سالدارىنان مىڭداعان وتباسى نەسيەلەرىن تولەي الماي، تاۋارلارىن ساتا الماي، شىعىنعا باتىپ وتىر. ءبىز ولارعا تەزىرەك جۇمىسقا ورالۋىنا، ەڭبەك ەتۋىنە جانە وتباسىلارىن اسىراۋعا مۇمكىندىك بەرۋىمىز كەرەك. كارانتين رەجيمىن جەڭىلدەتۋ تۋرالى شەشىم قابىلداۋ ءۇشىن ءبىر عانا نارسە قاجەت - قاۋىپسىزدىك تالاپتارىن ساقتاۋ. بۇل قيىن ەمەس. باستى ماقسات - كوپ ادام شوعىرلانعان جەرلەرگە بارماي، تالاپتاردى قاتاڭ ساقتاۋ. ماسكالار مەن انتيسەپتيكتەر ساتىلىمدا جەتكىلىكتى. وسى جاعدايلاردى ەسكەرە وتىرىپ، وبلىس اكىمى جانە جەدەل شتاب باسشىسى رەتىندە، ايماقتا كارانتين تالاپتارى ءتيىستى تۇردە ساقتالماسا، رەجيمدى قاتاڭداتۋعا ءماجبۇر بولاتىنىمىزدى ايتقىم كەلەدى. ءبىزدىڭ ورتاق ماقساتىمىز - ينفەكتسيادان ءبىرجولاتا تولىقتاي قۇتىلۋ. سوندىقتان تاعى دا بارلىق وبلىس تۇرعىندارىن سانيتارلىق تالاپتاردى ساقتاۋعا شاقىرامىن»، دەدى ءوڭىر باسشىسى.
ەسكە سالا كەتەيىك، بۇدان بۇرىن ب ق و- دا ادامداردىڭ ءبىر- بىرىنە كوروناۆيرۋس جۇقتىرۋى جيىلەپ وتىرعانىن جازعان بولاتىنبىز.