10:03, 27 - مامىر 2020 | GMT +6
تەڭىز كەنىشىندەگى احۋال تۇراقتالعان سوڭ جۇمىسشىلار جۇمىسىنا ورالادى – اكىم
اتىراۋ. قازاقپارات - تەڭىز كەنىشىندەگى جۇمىس جالعاسىن تابادى. جاعداي تۇراقتالعان كەزدە جۇمىسشىلار جۇمىسىنا ورالادى.
بۇل تۋرالى ونلاين بريفينگتە اتىراۋ وبلىسىنىڭ اكىمى ماحامبەت دوسمۇحامبەتوۆ ءمالىم ەتتى، دەپ حابارلايدى قازاقپارات.
جىلىوي اۋدانىنداعى تەڭىز كەنىشى ىندەتتىڭ وشاعىنا اينالعان. قازىر مۇندا دەزينفەكتسيالىق جۇمىستار جۇرگىزىلىپ جاتىر.
«كەن ورنىنان جۇمىسشىلاردى شىعارۋداعى ماقسات - ادامداردىڭ دەنساۋلىعى مەن قاۋىپسىزدىگىن ساقتاۋ. سول ارقىلى قاۋىپتى ىندەتتىڭ تارالىپ كەتۋىنە جول بەرمەدىك»، - دەدى وبلىس اكىمى ماحامبەت دوسمۇحامبەتوۆ.
اكىمنىڭ مالىمدەۋىنشە، تەڭىز كەن ورنىنان 18,5 مىڭ جۇمىسشى تۇرعىلىقتى مەكەنجايىنا شىعارىلعان.
«تەڭىز كەن ورنىندا جۇمىس توقتاپ، ادامدار جۇمىسسىز قالادى دەگەن ماسەلە تۋىنداپ وتىرعان جوق. كەنىشتەگى جۇمىس جالعاسىن تابادى. مۇنداعى احۋال تۇراقتالعان سوڭ جۇمىسشىلار جۇمىس ورنىنا ورالادى»،- دەدى وبلىس اكىمى.