قىزىلوردادا ءۇش كۇن بۇرىن سۋعا كەتكەن بالانىڭ ءمايىتى تابىلدى

نۇر- سۇلتان. قازاقپارات - قىزىلوردا قالاسىندا ءۇش كۇن بۇرىن كانالعا سۋعا اعىپ كەتكەن ون جاستاعى بالانىڭ ءمايىتى تابىلدى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەلىك، وقيعا 23 -مامىردا جەرگىلىكتى ۋاقىتپەن ساعات 18.00 شاماسىندا بولدى. قىزىلوردا قالاسىنا قاراستى تاسبوگەت كەنتىندەگى كانالعا شومىلعان ءۇشىنشى سىنىپ وقۋشىسى سۋعا اعىپ كەتكەن. سۋعا اعىپ كەتكەن بالانى ىزدەستىرۋگە 53 ادام جۇمىلدىرىلدى.

«قىزىلوردا وبلىستىق توتەنشە جاعدايلار دەپارتامەنتىنىڭ داعدارىس جاعدايلارىندا باسقارۋ باسقارماسىنا جەرگىلىكتى تۇرعىننان جەرگىلىكتى ۋاقىتپەن ساعات 17.38دە قالاعا قاراستى اباي اۋىلى تۇرعىنىنان حابار كەلىپ ءتۇستى. وندا «ەشپان» كۇرىش القاپتارىن سۋارمالى كانالىندا ءجاسوسپىرىمنىڭ ءمايىتى تابىلعانى ايتىلعان. ول تاسبوگەت كەنتى اۋماعىنداعى كانالدىڭ سۋعا تۇسۋگە ارنالماعان اۋماعىندا سۋعا باتىپ كەتكەن 2010 -جىلعى ءجاسوسپىرىمنىڭ ءمايىتى ەكەنى انىقتالدى. ءمايىت قىزىلوردا وبلىسى توتەنشە جاعدايلار دەپارتامەنتى جەدەل قۇتقارۋ جاساعىنىڭ قۇتقارۋشىلارىمەن سۋدان شىعارىلدى»، - دەپ ءمالىم ەتتى قىزىلوردا وبلىستىق توتەنشە جاعدايلار دەپارتامەنتى ءورت ءسوندىرۋ جانە اپاتتىق- قۇتقارۋ جۇمىستارى قىزمەتىنىڭ باسپا ءسوز حاتشىسى ءاليا ەرەجەپوۆا.

ۆەدومستۆونىڭ مالىمەتىنشە، جىل باسىنان بەرى وبلىستا 7 ادام سۋعا كەتتى. بىلتىر بۇل جاعدايدان بارلىعى 26 ادام قازا تاپسا، ونىڭ 10 ى بالا.

«ايماقتا ءالى سۋعا ءتۇسۋ ماۋسىمى باستالعان جوق. سوندىقتان تۇرعىنداردان قاۋىپسىزدىك شارالارىنا نازار اۋدارۋىن سۇرايمىز»، - دەدى دەپارتامەنت ماماندارى.