كارانتين: «اتامەكەن» بالاباقشا سالاسىنداعى پروبلەمانى كوتەردى

نۇر-سۇلتان. قازاقپارات - «اتامەكەن» ۇ ك پ الاڭىندا كارانتين كەزەڭىندەگى بالاباقشالاردىڭ جۇمىسى مەن وزەكتى پروبلەمالارى تالقىلاندى، دەپ حابارلايدى قازاقپارات ءتىلشىسى.

«توتەنشە جاعداي رەجيمى اياقتالعاننان كەيىن جەكە بالاباقشالاردىڭ جۇمىسى قالاي جالعاساتىنى، قارجىلاندىرۋ قالاي جۇرگىزىلەتىنى تۋرالى سۇراق تۋىندادى. ەلدە 4428 بالاباقشا بار. 339 مىڭ ادام جەكە بالاباقشالارعا بارادى. قازىرگى تاڭدا قاتتى زارداپ شەگىپ جاتقان سالالاردىڭ ءبىرى - جەكە ءبىلىم بەرۋ ۇيىمدارى. مىنا مالىمدەمە ورىندى بولار دەپ ەسەپتەيمىن: مەكتەپكە دەيىنگى ءبىلىم بەرۋدىڭ جەكە سەكتورى ءقازىر قۇرىپ كەتۋ الدىندا تۇر. ت ج ۋاقىتىندا بالالار بالاباقشاعا بارماعاننان كەيىن مەملەكەتتىك تاپسىرىس بويىنشا قاراجات بەرىلگەن جوق. ت ج رەجيمى اياقتالعاننان كەيىن مەملەكەتتىك تاپسىرىستى قالاي ساقتاپ قالۋ كەرەك دەگەن ماسەلە تۋىندادى»، - دەيدى پالاتانىڭ باسقارما ءتوراعاسىنىڭ ورىنباسارى ولجاس وردابايەۆ «اتامەكەن» ۇ ك پ ونلاين-جينالىسى بارىسىندا. ونىڭ ايتۋىنا قاراعاندا ءدال وسى كەزەڭدە جەكە بالاباقشالاردىڭ قىزمەتكەرلەرىنىڭ ايلىعىن تولەپ وتىرۋ كەرەك.

«70 مىڭ قىزمەتكەر ايلىقسىز قالۋى مۇمكىن (مەكتەپكە دەيىنگى ءبىلىم بەرۋ ۇيىمدارىندا). سول سەبەپتى ءبىز وتە وزەكتى ماسەلەمەن بەتپە-بەت كەلىپ وتىرمىز. ءبىزدىڭ ويىمىز - ناقتى سيپاتقا يە. ءبىلىم جانە عىلىم مينيسترلىگىمەن بىرگە قازىر جەكە بالاباقشالاردى قولداۋ، ولاردىڭ قىزمەتكەرلەرىنە ەڭ تومەنگى ايلىق مولشەرىن بەرىپ وتىرۋعا قاتىستى ماسەلەنى تالقىلاعان ەدىك. ولار جابىلىپ قالماۋى ءتيىس. كارانتين ۋاقىتى اياقتالعاننان كەيىن بالالار قايتادان بالاباقشالارعا بارا الاتىنداي جاعداي بولۋى ءتيىس»، - دەدى ولجاس وردابايەۆ. قازىرگى تاڭدا ەلدە 10314 مەكتەپكە دەيىنگى ۇيىم بار. ونىڭ 4428 ى - جەكە بالاباقشالار.