د د ۇ كوروناۆيرۋسكە قارسى ەكى پرەپاراتتىڭ قولدانىسىن توقتاتتى

جەنەۆا. قازاقپارات - دۇنيەجۇزىلىك دەنساۋلىق ساقتاۋ ۇيىمىنىڭ (د د ۇ) باسشىسى تەدروس ادراحوم گەبرەيەسۋس جەنيەۆادا ب ا ق ءۇشىن ۇيىمداستىرىلعان بريفينگ كەزىندە د د ۇ جاڭا كوروناۆيرۋسكە قارسى پرەپاراتتار - گيدروكسيحلوروحين مەن حلوروحيندى سىناقتان وتكىزۋدى ۋاقىتشا توقتاتقانىن مالىمدەدى.

قازاقپارات بۇل تۋرالى CNN گە سىلتەمە جاساپ حابارلايدى. شەشىم جۇما كۇنى The Lancet مەديتسينالىق جۋرنالىندا جاريالانعان وبسەرۆاتسيالىق زەرتتەۋ ناتيجەلەرى بويىنشا قابىلدانعان. زەرتتەۋ اۆتورلارىنىڭ ايتۋىنشا، كوروناۆيرۋسكە شالدىعىپ، گيدروكسيحلوروحين جانە حلوروحينمەن ەم العان پاتسيەنتتەردىڭ اراسىندا ءولىم دەڭگەيى جوعارى بولعان. تەدروس گەبرەيەسۋس سىناق جۇرگىزگەن تاۋەلسىز اتقارۋشى توپ قازىرگى كەزدە بارلىق قولجەتىمدى دالەلدەردى قاراستىرىپ، زەرتتەۋ اياقتالعانشا پرەپاراتتاردى قولدانۋدى ۋاقىتشا توقتاتقانىن ءمالىم ەتتى. اتقارۋشى توپقا زەرتتەۋگە قاتىسىپ وتىرعان 10 ەل ەنگەن. زەرتتەۋگە 35 ەلدەن 400 دەن استام اۋرۋحانانىڭ پاتسيەنتتەرى قاتىسۋدا.

بۇل - COVID-19 ىندەتىنە قارسى قاۋىپسىز ءارى ءتيىمدى پرەپاراتتاردى ىزدەۋ بويىنشا جاھاندىق زەرتتەۋ جۇمىسى. ددۇ باسشىسى زەرتتەۋدىڭ باسقا كەزەڭدەرى جالعاستىرىلىپ وتىرعانىن قوسىپ ءوتتى. ول سونداي- اق پرەپاراتتاردىڭ ەكەۋىن دە «اۋتويممۋندىق سىرقاتتارى بار نەمەسە بەزگەكپەن اۋىراتىن پاتسيەنتتەرگە قولدانۋ» قاۋىپسىز ەكەنىن اتاپ ءوتتى.

CNN- ءنىڭ جازۋىنشا، بۇعان دەيىن ا ق ش پرەزيدەنتى دونالد ترامپ دارىگەرمەن كەڭەسكەن سوڭ گيدروكسيحلوروحيندى كۇندەلىكتى قابىلداپ جۇرگەنىن ءمالىم ەتكەن. اق ءۇي باسشىسىنىڭ ايتۋىنشا، ول كوروناۆيرۋسپەن كۇرەس جۇرگىزىپ وتىرعان مەديتسينالىق قىزمەتكەرلەردەن پرەپارات تۋرالى وتە كوپ جاقسى پىكىر ەستىگەن. ترامپ كوروناۆيرۋسقا تەستتى بىرنەشە رەت تاپسىرىپ، بارلىعىندا دا تەرىس كورسەتكىش بولدى. پرەزيدەنت ترامپتىڭ پرەپارات تۋرالى پىكىرىنەن سوڭ، ونىڭ ساتىلىمى كۇرت ارتقان.