باياناۋىلعا باراتىن تۋريستەردىڭ سانى ارتۋى مۇمكىن
جەرگىلىكتى بيلىك تۋريستەردىڭ دەمالىسى جايلى بولۋ ءۇشىن ەڭ ءبىرىنشى ينفراقۇرىلىمدى جاقسارتۋدى قولعا العان. قازىر جاسىباي دەمالىس ايماعىندا جۇمىستىڭ ناعىز قىزعان شاعى. كولدىڭ اينالاسى رەتتەلىپ، اباتتاندىرۋ جۇمىستارى باستالدى. باياناۋىل - تۋريستىك الەۋەتى جوعارى ولكە. دەمالىس ايماقتارىن دامىتۋدىڭ تىڭ جوباسى وبلىس كولەمىندە جەتىلدىرىلىپ جاتىر. تۋريستەرگە قولايلى جاعداي تۋدىرۋ ءبىرىنشى كەزەكتە تۇرعان ماسەلە. ادەتتە، ساياحاتشىلاردىڭ سەرۆيستىك قىزمەت كورسەتەتىن ورىندارعا كوڭىلدەرى تولماي جاتادى. بيىلعى جۇمىس وسى ولقىلىقتاردىڭ ورىن تولتىرۋعا باعىتتالعان.
بەكزات بايدۇيسەن، باياناۋىل اۋدانىنىڭ دەنە شىنىقتىرۋ، سپورت جانە تۋريزم ءبولىمىنىڭ باس مامانى:
- باياناۋىل كۋرورتتىق ايماعىنا كەلۋشى تۋريستەر تولقىنى ارتۋى كۇتىلۋدە. سول باعىتتا ءبىرشاما جۇمىستار اتقارىلىپ جاتىر. كۋرورتتىق ايماقتا ورنالاسقان عيماراتتارعا بىرەگەي ديزاين - كود تالاپ ەتۋ، ياعني ارحيتەكتۋرالىق عيماراتتاردىڭ بىركەلكىلىگى ولاردىڭ جاعاجايلاردا مىسالى سابىندىكول، جاسىباي، تورايعىر جاعاجايلارىن اباتتاندىرۋ بويىنشا جۇمىستار، قوعامدىق دارەتحانالار سانيتارلىق - گيگيەنالىق توراپتاردى ورنالاستىرۋ، دۋش مودۋلدەرىن ورنالاستىرۋ. جاعاجايلارعا سۋدان قۇتقارۋ بەكەتتەرى، شەزلونگتار، كۇننەن قورعايتىن شاتىرلار، كيىم اۋىستىرۋ ورىندارى ورناتىلادى. ساۋدا پاۆيلوندارى، تاماقتانۋ پۋنكتتەرى اشىلادى. ال جاسىباي كولىنىڭ جاعاسىندا جايلىلىعى جوعارى جاڭا قوناق ءۇيدىڭ قۇرىلىسى اياقتالىپ قالعان. ول ءبىر مەزەتتە جۇزدەن اسا ادامدى قابىلدايدى. باياناۋىلدا قىسقى تۋريزم دامىپ كەلەدى. وسىعاين سايكەس، جاڭا دەمالىس نىساندارى تۋريستەردى جىلدىڭ بارلىق مەزگىلىندە قابىلداۋعا لايىقتالىپ تۇرعىزىلادى.
كونستانتين ۆالتەر، قوناق ءۇي كەشەنىنىڭ ديرەكتورى:
- ءبىز سالىپ جاتقان قوناق ءۇي كەشەنى، جوباسى جاعىنان قازىرگى زامان تالابىنا جاۋاپ بەرەتىن بارلىق تەحنولوگياعا ساي كەلەدى. قوناق ءۇي بيزنەسىنىڭ ەڭ جوعارعى دەڭگەيىن تاڭدادىق. دەمالۋشىلارعا قىزمەتتىڭ كەڭ ءتۇرىن ۇسىنامىز. الىستا جاتقان تۇركيا ەلىندەگى قوناق ۇيلەردەن كەم تۇسپەيدى. ساياحاتشىلاردى جايلى قوناق ۇيلەردەن بولەك سۋ اتراكتسيوندارى، جاعاجايلار مەن ويىن- ساۋىق الاڭدارى كۇتەدى. دەمالىس ايماعىندا وتىزعا تارتا تۋريستىك باعىت بار. تاريحي جانە تابيعي ەسكەرتكىشتەرگە بارار جولدارعا اسفالت توسەلۋدە.
قايىربەرگەن قىزىروۆ، باياناۋىل اۋدانى اكىمىنىڭ ورىنباسارى:
- «جۇمىسپەن قامتۋ جول كارتاسى» اياسىندا ۇزىندىعى 8 شاقىرىم بولاتىن جاسىباي - قوڭىر - اۋليە جولى سالىنىپ جاتىر. ونىڭ قۇنى شامامەن 100 ميلليون تەڭگە تۇرادى. تورايعىر اۋىلىنان سۇلتانماحمۇت تورايعىروۆتىڭ كەسەنەسىنە اپاراتىن جولدىڭ دا قۇرىلىسى باستالدى. ۇزىندىڭى 3,6 شاقىرىمدى قۇرايدى. وتكەن جىلى پاۆلودار وبلىسى مەملەكەت جانە قوعام قايراتكەرى، باياناۋىل دۋانىنىڭ اعا سۇلتانى بولعان، اعارتۋشى- ەتنوگراف مۇسا شورمانوۆتىڭ 200 جىلدىعىن اتاپ ءوتتى. تاريحي تۇلعانىڭ ەلى - باياناۋىل اۋدانىنىڭ تەڭدىك اۋىلىندا مۇسا شورمانوۆ كەسەنەسى بوي كوتەرىپ، جاڭادان جول سالىنعان بولاتىن. كەسەنەگە جاڭا تۋريستىك باعىت اشىلدى. بۇل ارعىسى بۇقار جىراۋ، مۇسا شورمانوۆ، بەرگىسى قانىش ساتبايەۆتىڭ كىندىك قانى تامعان كيەلى مەكەن.