08:22, 26 - مامىر 2020 | GMT +6
رەسەيلىك كلۋبتى قازاق باپكەرى جاتتىقتىراتىن بولدى
نۇر- سۇلتان. قازاقپارات - بەلگىلى فۋتبول مامانى يلشات ايتقۇلوۆ رەسەي چەمپيوناتىندا وينايتىن «ورىنبور» كلۋبىن جاتتىقتىرادى، دەپ حابارلايدى قازاقپارات كلۋبتىڭ رەسمي سايتىنا سىلتەمە جاساپ.
51 جاستاعى يلشات نۇرعالي ۇلى «ورىنبور» كلۋبىنىڭ باس باپكەرى كونستانتين ەمەليانوۆتى اۋىستىردى. ايتقۇلوۆ باس جاتتىقتىرۋشىنىڭ مىندەتىن اتقارۋشى بولىپ تاعايىندالدى، ول وسى قىزمەتتى ماۋسىم سوڭىنا دەيىن اتقاراتىن بولادى.
«ايتقۇلوۆ كومانداعا ماۋسىم سوڭىنا دەيىن جەتەكشىلىك ەتەدى. ونىڭ بولاشاعى كوماندانىڭ ناتيجەلەرىنە بايلانىستى بولادى. ءبىزدىڭ مىندەتىمىز — چەمپيوناتتى تابىستى اياقتاۋ» ، - دەدى «ورىنبور» ف ك قامقورشىلىق كەڭەسىنىڭ مۇشەسى ۆاسيلي ستولىپين.
يلشات ايتقۇلوۆ «ورىنبوردا» 2005 -جىلدان بەرى جۇمىس ىستەپ كەلەدى. Transfermarkt.de پورتالىنىڭ مالىمەتىنشە، ايتقۇلوۆتىڭ ۇلتى مەن ازاماتتىعى - قازاق. ەستەرىڭىزگە سالا كەتەيىك، بۇل كلۋبتا قازاقستان قۇراماسىنىڭ جارتىلاي قورعاۋشىسى يسلامبەك قۋات تا وينايدى.