د د ۇ كوروناۆيرۋس پاندەمياسىنىڭ ەكىنشى تولقىنى جونىندە ەسكەرتتى

بريۋسسەل. قازاقپارات - كوروناۆيرۋستى جۇقتىرۋ جاعدايلارى ازايىپ وتىرعان ەلدەر باقىلاۋدى السىرەتەتىن بولسا، ىندەتتىڭ ەكىنشى تولقىنىنا تاپ بولۋى مۇمكىن.

بۇل تۋرالى دۇيسەنبى كۇنى ونلاين- بريفينگ بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ دەنساۋلىق ساقتاۋ سالاسىنداعى توتەنشە جاعداي جونىندەگى باعدارلامانىڭ جەتەكشىسى مايكل رايان ايتتى، دەپ حابارلايدى «قازاقپارات» ح ا ا- نىڭ ارناۋلى ءتىلشىسى.

ونىڭ ايتۋىنشا، قازىر الەم كوروناۆيرۋس پاندەمياسىنىڭ العاشقى تولقىنىنىڭ بەل ورتاسىنا جەتتى. سەبەبى ورتالىق جانە وڭتۇستىك امەريكادا، وڭتۇستىك ازيادا جانە افريكادا ىندەتكە شالدىعۋ قارقىنمەن جالعاسۋدا.

اۋرۋدىڭ تارالۋى تولقىن تارىزدەس بولادى: وسىمنەن سوڭ تومەندەۋ بايقالىپ، كەيىن جۇقتىرۋ قايتا باستالادى. د د ۇ وكىلى اتاپ وتكەندەي، ماماندار «ەكىنشى تولقىن» ۇعىمىن كەلەسىدەي تۇسىندىرۋدە: ءبىرىنشى تولقىندا سىرقاتتانعاندار سانى بارىنشا تومەن دەڭگەيگە دەيىن ازايادى، ال بىرنەشە ايدان سوڭ اۋرۋ قايتا ءورشيدى. «جانە بۇل بىرنەشە ايدان كەيىن كوپتەگەن مەملەكەتتەردە كورىنىس تابۋى مۇمكىن»، - دەدى ول.

بۇل رەتتە، پاندەميانىڭ ەكىنشى كەزەڭى ماۋسىمدىق تۇماۋمەن تۇسپا- تۇس كەلۋى ىقتيمال. ونىمەن قوسا، م. رايان ادامزات پاندەميانىڭ ءبىرىنشى كەزەڭىندە ونى قايتا ءورشىتىپ الۋى مۇمكىندىگىن ەسكەرتتى. مۇنداي جاعداي 1918-1920-جىلدارى يسپان گريپىنىڭ پاندەمياسى كەزىندە بولعان. وسىعان وراي، الەم ەلدەرى دەنساۋلىق ساقتاۋ سالاسىنداعى كەشەندى شارالاردى جالعاستىرۋى ءتيىس، كوروناۆيرۋسقا تەستىلەۋدى توقتاتپاي، ونىڭ تارالۋ جولدارىن زەرتتەۋى قاجەت. سونداي- اق ينفەكتسيانىڭ ەكىنشى تولقىنىن بولدىرماس ءۇشىن الەۋمەتتىك شارالاردى كۇشىندە قالدىرعان ءجون.