ەۋروپا ەلدەرى تۋريستەردى قابىلداۋعا دايىندالىپ جاتىر
ماسەلەن، يسپانياداعى ەپيدەميولوگيالىق جاعداي 8 ماۋسىمنان كەيىن فۋتبولدان ۇلتتىق چەمپيوناتتى باستاپ، ال جازدا شەتەلدىك تۋريستەردى قابىلداۋعا مۇمكىندىك بەرىپ وتىر. بۇل تۋرالى ەلدىڭ پرەمەر- ءمينيسترى پەدرو سانچەس ءمالىم ەتكەن. «لا ليگا» باسشىلىعى الداعى كۇندەرى ناۋرىز ايىندا پاندەميا سالدارىنان توقتاتىلعان جارىس ويىندارىنىڭ كەستەسىن كەلىسۋدى جوسپارلاپ وتىر. ۇكىمەت باسشىسى وسى ارادا تۋريستىك ماۋسىمنىڭ اشىلۋىنا قارسى مەيرامحانالار، قوناقۇيلەر مەن جاعاجايلاردى دايىنداۋعا شاقىردى.
«يسپانيا جىل سايىن 80 ميلليوننان استام قوناقتى قابىلدايدى. شىلدە ايىنان باستاپ شەتەلدىك تۋريستەر ەلگە قاۋىپسىز جاعدايدا كەلە الاتىنىن جاريالايمىن. وسى كەزدەن باستاپ، شەتەلدىك تۋريستەر ەلىمىزدە دەمالىسىن جوسپارلاي الادى»، - دەدى ول.
ال يتاليا ەۋرووداق ەلدەرىنەن كەلەتىن تۋريستەردى رەسمي تۇردە 3 - ماۋسىمنان قابىلداۋعا ءازىر. مۇندا مۇراجايلار جۇمىسىن باستاۋدا. بەيسەنبى كۇنى - كوليزەي، ودان كەيىن فلورەنتسياداعى ۋففيتسي گالەرەياسى اشىلادى. 1 ماۋسىمنان باستاپ بيلەتتەرىن برونداعان كەلۋشىلەر ۆاتيكان مۇراجايلارىن تاماشالاي الادى.
گرەكيا ەلى دە تۋريستەردىڭ اعىنىنا دايىندىق ۇستىندە. ەندى، ەپيدەميولوگيالىق احۋالى جاقسى مەملەكەتتەردىڭ تۋريستەرى بۇل ەلگە كوروناۆيرۋسقا تەست تاپسىرماي جانە كارانتينگە وقشاۋلاۋسىز كەلە الادى.
حورۆاتيا ۇكىمەتى ءوز تۋريستەرى ءۇشىن شەكارانى 15-ماۋسىمنان كەيىن اشادى. فرانتسيا بيلىگى ىشكى ءتۋريزمنىڭ ماڭىزىن ەرەكشە اتاپ وتۋدە. ەلدىڭ پرەمەر- ءمينيسترى ەدۋار فيليپپ تۋريزم سەكتورىنا قاتىستى جوسپارلاردى كەلەسى اپتادا ۇسىنۋدى ۋادە ەتتى.
گەرمانيادا دا كارانتين شارالارى بارا- بارا جۇمسارىپ كەلەدى. كانتسلەر انگەلا مەركەل ەل ازاماتتارىن اسىقپاي ءارى ەرەكشە ساقتىقپەن ارەكەت ەتۋگە شاقىردى.
ەۋروپادا كوروناۆيرۋس جۇقتىرۋدىڭ 2 ميلليوننان استام وقيعاسى تىركەلگەن، 170 مىڭعا جۋىق ادام قايتىس بولدى. سوڭعى مالىمەتكە سايكەس، الەمدە ىندەتكە شالدىققانداردىڭ جالپى سانى 5,5 ميلليونعا جۋىقتادى.