+7 (701) 759 90 19
16 °С : نۇر-سۇلتان
20 °С : الماتى
USD 412.55 EUR 465.73
RUB 5.79 CNY 58.91
جاڭالىقتار

كوروناۆيرۋستىڭ قاۋىپتى ەكەندىگىن ءوز باسىمنان وتكىزىپ ءبىلدىم - ورالدىق دارىگەر

25 مامىر 10:47
:ءبولىسۋ
كوروناۆيرۋستىڭ قاۋىپتى ەكەندىگىن ءوز باسىمنان وتكىزىپ ءبىلدىم - ورالدىق دارىگەر

ورال. قازاقپارات - كوروناۆيرۋستىڭ قاۋىپتى اۋرۋ ەكەندىگىن ءوز باسىمنان وتكىزىپ ءبىلدىم. بۇل تۋرالى ورالدىق دارىگەر ادىلبەك نۇرىمبەت ءمالىم ەتتى، دەپ حابارلايدى قازاقپارات ءتىلشىسى.

ول س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىن بىتىرگەننەن كەيىن 2011-2014 -جىلدارى قىزىلوردا قالاسىندا جۇمىس ىستەگەن. ادىلبەك 2014 -جىلدان بەرى ورال قالاسىنداعى №4 ەمحانادا جالپى تاجىريبەلىك دارىگەر رەتىندە ەڭبەك ەتىپ كەلەدى ەكەن. ول سونىمەن قاتار التى جىل بويى وبلىستىق جۇقپالى اۋرۋلار اۋرۋحاناسىندا دا تۇندە كەزەكشىلىك جۇمىس اتقارىپ، ينفەكتسيونيست رەتىندە ماماندانىپتى. ءوزىنىڭ Facebook-تەگى پاراقشاسىندا جازعانىنداي، ورالدا كوروناۆيرۋس كوبەيىپ كەتكەننەن ءساۋىر ايىنىڭ اياعىندا وسى دەرتكە شالدىققان ناۋقاستاردى ەمدەۋگە شاقىرعان.

«دارىگەر، ونىڭ ىشىندە ينفەكتسيونيست بولعان سوڭ، تىكەلەي بورىشىم عوي دەپ دايىندالىپ باردىم. بارار الدىندا ەمحانادا COVID-19-عا پ ت س ر تاپسىردىم. تازا بولعان سوڭ جۇمىسقا كىرىسىپ كەتتىم. قورعانىش كيىمدەرىن كيىپ، ساقتىق شارالارىن ساقتادىق. پاتسيەنتتەردى ەمدەپ، بارىنشا ءتۇسىندىرىپ جۇردىك. سول ءساۋىر ايىنىڭ اياعىندا بىرنەشە مەديتسينا قىزمەتكەرىنىڭ (دارىگەرلەر، مەدبيكە، سانيتاركالار) كوروناۆيرۋس جۇقتىرعانى انىقتالدى. مەنەن دە العان. تازا بولىپ شىقتى. سولارمەن تىكەلەي قاتىناستا بولدىڭدار دەپ ءبىزدى كۋمىسكاداعى پروۆيزورلىق ستاتسيونارعا جاتقىزدى»، دەيدى ول.

«قىزۋىم 37,2-37,3 گرادۋس اينالاسىندا بولدى. باسىم، بۋىندارىم، بەلىم اۋىرعانى كۇشەيمەسە باسىلمادى. باسىمدى كوتەرە المادىم. شىنىمدى ايتسام، بەس كۇن ءنار تاتپادىم. تاماققا تابەتىم مۇلدەم بولمادى. ءوزىم ينفەكتسيونيست بولىپ جۇمىس جاساعاندا قانشا ۆيرۋستى اۋرۋلاردى ەمدەي ءجۇرىپ، اراسىندا تۇماۋمەن ءوزىم دە اۋىردىم. ءبىراق ءدال وسىنداي اۋرۋدى كورگەن ەمەسپىن. تەمپەراتۋرا 38,0-38,5 گرادۋس بولعاندا دا پاراتسەتامول ءىشىپ، جۇمىسىمىزدى جالعاستىرىپ جۇرە بەرۋشى ەدىك. ال مىنا اۋرۋدا بەس كۇن باسىمدى كوتەرە المادىم. وعان جوتەل مەن كەۋدەدەگى قاتتى اۋىرسىنۋ قوسىلدى. وكپەنى كومپيۋتەرلىك توموگرافياعا تۇسىرگەندە، ەكى جاقتى پنيەۆمونيا انىقتالدى. قوسىمشا تاعى ەم قوسىلدى. 15 كۇن دەگەندە تولىق وزىمە كەلدىم. 24 كۇن جاتىپ، ەكى رەت سىناما تاپسىرىپ، تازا بولعان سوڭ 24 - مامىر كۇنى اۋرۋحانادان شىقتىم. كارانتين باستالعاندا، اياعى اۋىر كەلىنشەگىمدى بالالارمەن اۋىلعا جىبەرگەن ەدىم. كوروناۆيرۋس جۇقتىرىپ العانىمدى اكە- شەشەمە دە، كەلىنشەگىمە دە ايتپادىم. تەك كونتاكتىدا بولعانىم ءۇشىن كارانتيندە جاتىرمىن دەدىم. سەبەبى ولار قۇر باسقا ۋايىمداعاننان باسقا نە ىستەي الادى!؟ تەك شىققان سوڭ عانا اۋىرىپ ەمدەلگەنىمدى، ۋايىمداۋدىڭ قاجەتى جوق ەكەنىن ايتتىم» ، دەپ جازادى ءا. نۇرىمبەت باسىنان وتكەنىن جاسىرماي.

«ايتايىن دەگەنىم، كوروناۆيرۋس باسقا جۇقپالى اۋرۋلارعا ۇقسامايدى. وتە اۋىر وتەدى جانە ۇزاق ەمدەلۋدى قاجەت ەتەدى. قانداي اۋرۋ بولسا دا 7-9 كۇننەن اسپايتىن. قاسىمدا جاتقانداردا دا، بىرگە تۇسكەن مەدقىزمەتكەرلەردە دە مەنىكىندەي جاعداي بولدى. ينتوكسيكاتسيا، پنيەۆمونيا. سوندىقتان بۇل اۋرۋعا نەمقۇرايلى قاراۋعا بولمايدى. مەن جاتقاندا ءبىر جىگىت ءتۇستى. كوروناۆيرۋس جۇقتىرعان ناۋقاسپەن قارىم- قاتىناستا بولعان. سىناما العاندا، تازا بولىپ شىققان. بايلانىستا بولعانى ءۇشىن 14 كۇن پروۆيزورلىق ستاتسيونارعا جات دەگەندى تىڭداماي، ايقايلاسىپ، ۇيىنە كەتىپ قالعان. بەس كۇننەن سوڭ بۇكىل وتباسىمەن كەلىپ ءتۇستى. بارلىعىندا تەمپەراتۋرا، جوتەل، ينتوكسيكاتسيا. قازىر وزىمدە بارلىعى جاقسى. ءبىراق قاتتى اۋىرعان كەزىمدى ويلاسام، جۇرەگىم اۋىرىپ كەتەدى. ابايلايىق، باۋىرلار، ساقتىق شارالارىن ۇمىتپايىق!» دەپ تۇيىندەدى ويىن ورالدىق دارىگەر.



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات