+7 (701) 759 90 19
19 °С : نۇر-سۇلتان
15 °С : الماتى
USD 405.69 EUR 455.51
RUB 5.72 CNY 57.42
جاڭالىقتار

ديماش قۇدايبەرگەن: مەن ءۇشىن مۋزىكا - ماتەماتيكادان دا كۇردەلى عىلىم

25 مامىر 08:49
:ءبولىسۋ
ديماش قۇدايبەرگەن: مەن ءۇشىن مۋزىكا - ماتەماتيكادان دا كۇردەلى عىلىم

نۇر- سۇلتان. قازاقپارات - بۇگىن ديماش قۇدايبەرگەن Instagram پاراقشاسىندا جانكۇيەرلەرىمەن قاۋىشىپ، ولاردىڭ سۇراقتارىنا جاۋاپ بەردى.

قازاقپارات الەمگە تانىمال ءانشىنىڭ سۇحباتىن نازارلارىڭىزعا ۇسىنادى.

- جاڭا البومىڭىز قاشان جارىق كورەدى؟

- جاڭا البوم جازىلۋ ۇستىندە. جاقىندا تىڭدارماندارعا جول تارتادى دەپ ۇمىتتەنەمىن. البوم جازۋ مەن ءۇشىن وتە جاۋاپتى، ماڭىزدى ءىس. جايباراقات، اسىعىس- ۇسىگىس البوم شىعارۋ - مەنىڭ تابيعاتىما جات دۇنيە. سوندىقتان ابدەن ءپىسىرىپ، ويىمنان، جۇرەگىمنەن وتكىزىپ بارىپ نازارلارىڭىزعا ۇسىنامىن. كارانتين كەزىندە سىزدەردىڭ كوزقاراستارىڭىز بويىنشا ءبىزدىڭ شىعارماشىلىق جۇمىسىمىز توقتاپ قالعانداي بولىپ كورىنۋى مۇمكىن، ءبىراق ءبىز ۇيدە دايىندالىپ، جۇمىس ىستەپ جاتىرمىز.

- كەلەسى كونتسەرتىڭىز قاشان بولادى؟

- قازاقستاندا ەكى جىلدا ءبىر رەت 2017 جانە 2019 -جىلى Arnau جانە Bastau دەپ اتالاتىن كونتسەرتىمدى تاماشالادىڭىزدار. ەندىگى كونتسەرتىم قاشان، قاي جىلى بولاتىنى بەلگىسىز. ءوزىم قالاماعاندىقتان ەمەس، كارانتين سياقتى ءارتۇرلى سەبەپ بولىپ قالۋى مۇمكىن. جولىمدى كەسىپ، الدىن الا ايتپايىن، ونىڭ ءبارى بولاشاقتىڭ ەنشىسىندە.

- ءاندى قالاي شىعاراسىز؟ شابىت قالاي كەلەدى؟

- مەن كومپوزيتسيا بويىنشا ماگيستراتۋرا بىتىرسەم دە، ءوزىمدى كومپوزيتور سانامايمىن. كەيدە الدەبىر اۋەن «كەلىپ» ، ونى ديكتوفونعا جازۋعا نەمەسە نوتاعا تۇسىرۋگە اسىعامىن. شابىت كوبىنەسە ۇشاقتا كەلەدى نەمەسە تۇندە ويانىپ، كونتسەرتىم قالاي وتەتىنىن كوز الدىما ەلەستەتىپ جاتام. سول كەزدە دە شابىت كەلىپ، ءان جازىلۋى مۇمكىن. ادام بالاسى جاقسىعا دا، جامانعا دا، اتاققا دا، حالىق ماحابباتىنا دا تەز ۇيرەنەدى. مەنى اتا- انامنىڭ قۋانىشى شابىتتاندىرادى. ولاردىڭ جۇزىندەگى قۋانىشتى كورگەن سايىن تاعى دا قۋانتقىم كەلىپ تۇرادى. مەنىڭ ءار كونتسەرتىم، جەڭىسىم، العان ماراپاتىم ولار ءۇشىن ۇلكەن باقىت، ۇلكەن مەرەكە. انامنىڭ قۋانىشتان اققان كوز جاسىن كورگەن كەزدە كەلەسى جولى قالاي قۋانتارىمدى ويلاپ تۇرامىن. ونىڭ وسىنداي كۇيىنە مەن ءومىر بويى بوي ۇيرەتە الماي وتەتىن سياقتىمىن.

- ومىرىڭىزدە بولعان قىزىقتى وقيعانى ايتىپ بەرە الاسىز با؟

- مەن ءوزىمدى جولى بولعىش ادام سانايمىن. سوعان دالەل بولا الاتىن ءبىر مىسال: مەن باسقا ەمەس، ءدال وسى وتباسىدا دۇنيەگە كەلگەنىم ءۇشىن قۋانامىن. جاسىم 26 عا كەلسە دە اتا- انام اقىل ايتىپ، تاربيەلەپ وتىرادى. مەن اتا- انا دەگەندە اتا، اجەمدى ايتىپ وتىرعانىمدى تۇسىنەتىن شىعارسىزدار. قازاقتىڭ سالت- ءداستۇرى بويىنشا مەنى ومىرگە اكەلگەن اتا- انام مەنى اتا- اجەمنىڭ قولىنا بەرگەن، سوندىقتان ولاردى دا اكە، انا دەپ اتاپ كەتتىم جانە كونتسەرتتەردە دە ەكى اتا- انام بار ەكەنىن ايتىپ جۇرەمىن. ءسابيدى اتا- اجەگە بەرۋدىڭ تاربيەلىك ءمانى زور، ول جاس وتباسى مەن اتا- ەنە اراسىن جاقىنداتادى، سونىمەن قاتار ەنە مەن كەلىن اراسىندا ديپلوماتيالىق قارىم- قاتىناس دەۋگە بولادى.

تاعى ءبىر قىزىقتى جاعداي: مەنى ومىرگە الىپ كەلگەن اتا- انام ساحنادا ونەر كورسەتىپ بولعان سوڭ كورەرمەن ساحناعا شىعىپ، ولاردى قۇتتىقتايتىن. مەن دە اتا- اجەممەن بىرگە كورەرمەندەر قاتارىندا وتىرىپ، كونتسەرت اياقتالعان سوڭ ساحناعا شىعىپ، ورتاسىندا تۇرىپ الىپ، باسىمدى يزەپ، راحمەت ايتاتىنمىن. قۇددى ءبىر كونتسەرتتى اكەم، انام ەمەس ءوزىم بەرىپ تاستاعان سياقتىمىن. بالا كەزىمدەگى وسى ءسات مەنىڭ كوز الدىمدا قالىپ قويدى. تاعى ءبىر قىزىقتى جاعداي: اتا- انامنىڭ ايتۋى بويىنشا، ەڭ العاش 2 جاسىمدا ساحناعا شىعىپپىن. 10 سەكۋندتىق ەپيزودقا قاتىسۋىم كەرەك بولعان، ياعني ساحنانىڭ ءبىر جاعىنان شىعىپ، ەكىنشى جاعىنا جۇگىرىپ ءوتۋىم كەرەك ەكەن. مەن بولسام ساحنانىڭ ورتاسىندا توقتاپ، حالىققا كوز الماي قاراپ قالىپپىن. ولار قول شاپالاقتاعان كەزدە ساحنادان تىپتەن كەتكىم كەلمەي قالعان ەكەن. سودان كەيىن ۇيىمداستىرۋشىلار مەنى ساحنادان الىپ كەتپەك بولىپ، مەن ولارعا ۇستاتپاي ساحنانى اينالىپ قاشقان ەكەنمىن. بۇل اتا- انام ايتىپ بەرگەن جاعداي.

- بولاشاقتا قانداي جوسپارىڭىز بار؟

- قازىرگى جوسپار - كەيىنگە شەگەرىلگەن كونتسەرتتەردى وتكىزۋ. جاڭا كونتسەرت جۇمىس كەستەسىنە ەنەتىن بولسا سىزدەرگە مىندەتتى تۇردە حابارلايتىن بولامىز. سىزدەرمەن قاۋىشاتىن ءساتتى اسىعا كۇتىپ جۇرەمىن.

- كونتسەرتتەن كەيىن قالاي قالىپقا كەلەسىز؟

- كوبىنەسە ۇنسىزدىكتە بولامىن. كونتسەرت الدىندا دا جالعىز قالۋدى جاقسى كورەم، ول تۋرالى مەنىڭ توبىمدا جۇمىس ىستەيتىندەر جاقسى بىلەدى.

- وزگە تىلدە ءان ايتقاندا سوزدەرىن تۇسىنەسىز بە؟

- مەن الدىمەن مۋزىكا ءتىلىن تۇسىنۋگە تىرىسامىن. وبرازعا كىرىپ، مۋزىكانىڭ سۇلۋلىعىن سەزىنەمىن، ودان كەيىن مەنىڭ سەزىنگەنىم كورەرمەنگە جول تارتادى. مۋزىكانىڭ ءوز ءتىلى، ءوز كۇشى بار. مەن قازاق، ورىس ءتىلىن جانە ازداپ اعىلشىن ءتىلىن بىلەمىن. ءانشى بولۋ وڭاي دەپ ويلايتىندار قاتەلەسەدى. مۋزىكا - عىلىم، كۇردەلىلىگى جاعىنان ماتەماتيكادان قيىن بولماسا، وڭاي ەمەس. مەن مۋزىكانت رەتىندە ۇيرەنەرىم كوپ، مۋزىكانىڭ شەگى جوق.

- الىپ- قوسارىڭىز بار ما؟

- مۇنداي باقىتقا كەنەلگەن مەندە ارمان جوق شىعار. نازارلارىڭىزعا مىڭ مارتە العىس ايتامىن، ويتكەنى مەنىڭ شىعارماشىلىعىمدى باعالاۋ ارقىلى سىزدەر مەنى عانا ەمەس، مەنىڭ اتا- اجەمدى قۋانتىپ جاتىرسىزدار. مەن ءۇشىن ودان اسقان باقىت جوق. ءارقايسىسىڭىزدىڭ وتباسىڭىزعا اللا تاعالا باق- بەرەكە بەرسىن. ورازا ايت قۇتتى بولسىن!



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049

مۇراعات