ەلوردادا سوڭعى قوڭىراۋ سالتاناتى ونلاين وتەدى

نۇر- سۇلتان. قازاقپارات - ەلوردادا سوڭعى قوڭىراۋ سالتاناتى قالاي وتەتىنى بەلگىلى بولدى، دەپ حابارلايدى قازاقپارات قالا اكىمىنىڭ رەسمي سايتىنا سىلتەمە جاساپ.

«بۇگىن 1-10 - سىنىپتاردا ونلاين- سوڭعى قوڭىراۋ شاراسى، 3 - ماۋسىمدا مەكتەپ ءبىتىرۋشى تۇلەكتەرگە اتتەستات تابىستاۋ ءراسىمى مەكتەپ اۋلاسىندا وتكىزىلەدى. ال بالاباقشالار قازىرگىدەي «كەزەكشى توپ» رەجيمىندە جۇمىسىن جالعاستىرادى» دەپ حابارلايدى ءبىلىم باسقارماسىنىڭ باسشىسى شولپان قادىروۆا.

بۇگىن ساعات 11-دە تەلەارنالار ارقىلى قازاقستان رەسپۋبليكاسى ءبىلىم جانە عىلىم ءمينيسترى اسحات ايماعامبەتوۆ تۇلەكتەردى قۇتتىقتايدى. سونىمەن قاتار، سول كۇنى بارلىق مەكتەپتەردە مۇمكىندىگىنشە اتا- انالاردىڭ، قامقورلىق كەڭەس مۇشەلەرىنىڭ، بيزنەس وكىلدەرىنىڭ، مەكتەپتى ۇزدىك بىتىرگەن بۇرىنعى تۇلەكتەردىڭ قاتىسۋىمەن 1-10 - سىنىپتارعا ارنالعان ونلاين سوڭعى قوڭىراۋ وتكىزىلەدى. اتالمىش شارا ەركىن كەستە بويىنشا وتەدى. بيىل مەكتەپ ءبىتىرۋ ءىس- شاراسى قر بعم نۇسقاۋلىعى بويىنشا «Birgemiz: تۇلەك-2020» ۇرانىمەن وتەدى. 3 -ماۋسىم كۇنى بارلىق مەكتەپتەردە 11 - سىنىپ تۇلەكتەرى ءۇشىن اتتەستاتتار مەن «التىن بەلگىنى» تاپسىرۋ ءراسىمى وتكىزىلەدى. ءىس- شارا مەكتەپ اۋماعىندا، اشىق اسپان استىندا ۇيىمداستىرىلادى.

مەكتەپ بىتىرۋشىلەردىڭ مەكتەپ فورماسىمەن قاتىسۋى قاتاڭ تۇردە ەسكەرتىلەدى. سالتاناتتى راسىمنەن كەيىن «تۇلەكتەر اللەياسىندا» اعاش وتىرعىزۋ جوسپارلانعان. ءبىتىرۋ ءىس- شارالارىن وتكىزۋ كۇندەرى مەكتەپ اكىمشىلىگىنە قۇقىق بۇزۋشىلىققا جول بەرمەۋ، سانيتارلىق جانە ەپيدەمياعا قارسى رەجيمدى قاتاڭ ساقتاۋ شارالارى جۇكتەلدى. 18 -مامىردان باستاپ مەنشىك نىسانىنا قاراماستان بارلىق مەكتەپكە دەيىنگى ۇيىمدار سانيتارلىق- دەزينفەكتسيالىق رەجيمدى ساقتاي وتىرىپ، ءوز جۇمىسىن ءبىرىنشى كەزەكتە بالانى ۇيدە قالدىرۋعا مۇمكىندىگى جوق، جۇمىس ىستەيتىن اتا- انالار ءۇشىن «كەزەكشى توپ» رەجيمىندە قايتا باستادى. ەلوردادا 55708 بالا بار. ءتۇرلى تيپتەگى 377 مەكتەپكە دەيىنگى ۇيىم جۇمىس ىستەيدى.