ماۋلەن اشىمبايەۆ: ورازا ايت مەرەكەسى جاقسىلىقتىڭ جارشىسى
قۇرمەتتى دوستار! بارشاڭىزدى قاسيەتتى ورازا ايت مەرەكەسىمەن قۇتتىقتايمىن! بۇل - رامازان ايىنىڭ اياقتالعانىن بىلدىرەتىن، بۇكىل الەم مۇسىلماندارى ءۇشىن قاستەرلى سانالاتىن ەڭ ۇلىق مەيرامداردىڭ ءبىرى. وسى كۇندەرى تاتۋلىق، قايىرىمدىلىق، مەيىرىمدىلىك سياقتى ىزگى قاسيەتتەر كەڭىنەن دارىپتەلەدى. وتىز كۇن بويى ورازا تۇتقان جاندار ءبىر- بىرىنە يگى تىلەكتەرىن ارناپ، قۋانىشتى كۇيگە بولەنەدى. سوندىقتان ايت مەرەكەسىن جاقسىلىقتىڭ جارشىسى دەۋگە تولىق نەگىز بار.
بيىل رامازان ايى كوروناۆيرۋس ىندەتىنىڭ تارالۋىمەن تۇسپا- تۇس كەلدى. دەگەنمەن، بۇل جاعداي قازاقستان مۇسىلماندارىن ەش جاسىتقان جوق. قايتا حالقىمىزدىڭ ىرىس- ىنتىماعى ودان ءارى ارتا ءتۇستى. ويتكەنى ورازا قازىرگىدەي كۇردەلى كەزەڭدە ادامزاتتى بەرەكە مەن بىرلىككە، سابىرلىق پەن توزىمدىلىككە ۇندەيدى. وسىنداي اسىل قاسيەتتەردىڭ ارقاسىندا ءبىز ءقاۋىپتى دەرتتى اۋىزدىقتاپ، بارلىق قيىندىقتى بىرلەسىپ ەڭسەرەمىز دەپ سەنەمىز.
سىزدەردى وسى مەرەكەمەن قۇتتىقتاي وتىرىپ، ۇستاعان ورازالارىڭىز بەن تىلەگەن دۇعا- تىلەكتەرىڭىز قابىل بولسىن دەگىم كەلەدى. ايدان ايعا، جىلدان جىلعا امان- ەسەن جەتە بەرەيىك. ۇلىق مەيرام ءار شاڭىراققا شاتتىق پەن باق- بەرەكە اكەلسىن! ايت مۇباراك بولسىن!