الكوگول ءىشىپ، شىلىم تارتقان ادامنىڭ مۇشەلەرى دونورلىققا الىنا ما

نۇر- سۇلتان. قازاقپارات – ق ر ۇلتتىق كارديوحيرۋرگيالىق ورتالىعىنىڭ باسقارما ءتوراعاسى يۋريي پيا دونورلىق ورگاندار تۋرالى ايتىپ بەردى، دەپ حابارلايدى قازاقپارات ءتىلشىسى.

«ءبىز زەرتحانالىق دەرەكتەر ارقىلى ورگاننىڭ كلينيكالىق جاعدايىنا قارايمىز. ەگەر ورگان جۇمىس ىستەپ تۇرسا، ادامنىڭ ىشىمدىك ىشكەنى نەمەسە شىلىم شەككەنى ماڭىزدى ەمەس. اسىرەسە جۇرەككە قاتىستى. وكپەدە كەيبىر قيىندىقتار تۋىنداۋى مۇمكىن. جۇرەك پەن وكپەنىڭ جاي- كۇيىن باعامداۋعا كومەكتەسەتىن ارنايى جۇيەلەر بار. جوعارى تەحنولوگيالار ارقىلى جۇرەك پەن وكپەنىڭ قانداي جاعدايدا ەكەنىن انىقتاي الامىز»، - دەدى يۋريي پيا كارديوحيرۋرگيالىق ورتالىقتا وتكەن باسپا ءسوز ءماسليحاتىندا.

بۇعان دەيىن يۋريي پيا كوروناۆيرۋستان قايتىس بولعانداردىڭ دونورلىعى تۋرالى ايتىپ بەرگەن ەدى. «مەنىڭ جەكە پىكىرىم - ءار ناۋقاستى دەربەس قاراستىرۋ. ورگانعا مۇقتاج ادامنىڭ ساناۋلى كۇنى قالسا، بۇل وتا ونىڭ ۇزاعىراق ءومىر سۇرۋىنە مۇمكىندىك بەرسە، تاۋەكەل ەتۋ كەرەك. بۇل - مەنىڭ جەكە پىكىرىم. ادام ءومىرىن ءتىپتى 1 كۇنگە ۇزارتۋعا مۇمكىندىك بەرسە، بۇل مۇمكىندىكتى پايدالانۋ كەرەك»، - دەدى دارىگەر.

ەسكە سالا كەتسەك، پاۆلوداردا ينسۋلتتەن كوز جۇمعان ەر ادامنىڭ اعزا مۇشەلەرى 5 ادامعا ءساتتى اۋىستىرىلدى. جۇرەك 35 جاستاعى ەر ادامعا بەرىلسە، وكپە - 41 جاستاعى ايەلگە جاڭا ءومىر سىيلادى. ودان بولەك، قوس بۇيرەگى ەلوردانىڭ تاعى ءبىر ورتالىعىندا ەكى ناۋقاسقا ءساتتى ورنالاستىرىلدى. ال باۋىر الماتىداعى ناۋقاسقا جىبەرىلدى.

اۆتور: ايجان سەرىكجان قىزى