ساياسي پارتيالاردى قۇرۋ مەن تىركەۋ تالابى ەداۋىر جەڭىلدەيدى - ماۋلەن اشىمبايەۆ
بۇل تۋرالى بۇگىن ق ر پارلامەنتى سەناتىنىڭ ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
«پرەزيدەنتىمىزدىڭ ۇسىنىسىمەن بۇگىن قابىلدانىپ وتىرعان زاڭدار ەلدىڭ ساياسي ومىرىندە ەرەكشە مانگە يە. ساياسي پارتيالاردى قۇرۋ مەن تىركەۋ تالابى ەداۋىر جەڭىلدەتىلىپ وتىر. پارتيالاردى تىركەۋدىڭ تالاپتىق شەگى تومەندەتىلدى. قابىلدانعان زاڭدار كوپپارتيالىق جۇيەنى ودان ءارى نىعايتۋعا سەپتىگىن تيگىزەتىنى ءسوزسىز»، - دەدى م. اشىمبايەۆ سەناتتىڭ جالپى وتىرىسىندا مۇنىمەن قوسا ول ايەلدەر مەن جاستارعا ەلىمىزدىڭ قوعامدىق-ساياسي ومىرىنە بەلسەنە قاتىسۋى ءۇشىن قوسىمشا مۇمكىندىك بەرىلەتىنىن اتاپ ءوتتى.
«سونداي-اق پارتيالاردىڭ سايلاۋ تىزىمىندە ايەلدەر مەن جاستار ءۇشىن 30 پايىزدىڭ مىندەتتى كۆوتا بەلگىلەندى. ول ايەل ادامداردىڭ جانە جاستارعا ەلىمىزدىڭ قوعامدىق- ساياسي ومىرىنە بەلسەنە قاتىسۋى ءۇشىن قوسىمشا مۇمكىندىك بەرەدى. مۇنداي وزگەرتۋلەردى دەموكراتيالىق دامۋ جولىنداعى ناقتى قادام دەپ قاراستىرۋىمىز كەرەك. ولار ساياسي جۇيەمىزدى ارى قاراي دامىتۋعا ۇلەس قوسادى دەپ سەنەمىز»، - دەدى سەنات ءتوراعاسى.
بۇدان بۇرىن حابارلانعانداي، سەناتتىڭ جالپى وتىرىسىندا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭى مەن «ساياسي پارتيالار تۋرالى» زاڭىنا وزگەرىس پەن تولىقتىرۋلار ەنگىزۋ تۋرالى» زاڭى قابىلداندى.