ە ۇ ۋ رەكتورى ەرلان سىدىقوۆ جەمقورلىقپەن كۇرەس شارالارى تۋرالى ايتىپ بەردى

نۇر- سۇلتان. قازاقپارات - ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ وقۋ ورنىنداعى سىبايلاس جەمقورلىقپەن كۇرەس شارالارى تۋرالى ايتىپ بەردى، دەپ حابارلايدى قازاقپارات ءتىلشىسى.

«سىبايلاس جەمقورلىقپەن قارسى كۇرەس اگەنتتىگى «ادالدىق الاڭدارىن» اشۋ تۋرالى باستاما كوتەرگەن ەدى. ونى ءبىلىم جانە عىلىم مينيسترلىگى العاشقىلاردىڭ ءبىرى بولىپ قابىلداپ، «ادال ءبىلىم» جوباسىن باستادى. «ادال ءبىلىم» كەڭسەلەرى بارلىق وقۋ ورىندارىندا اشىلا باستادى. ءبىز ءوز ورتالىعىمىزدى «ادەپ» دەپ اتادىق، ونى زاڭ عىلىمدارىنىڭ كانديداتى، وقىتۋشى ەركەبۇلان نۇعىمانوۆ باسقارادى»، - دەدى رەكتور سىبايلاس جەمقورلىققا قارسى قىزمەتتىڭ ANTIKOR ورتالىعىندا وتكەن سۇحباتتا.

ورتالىق ستۋدەنتتەرى سىبايلاس جەمقورلىقتىڭ الدىن الۋ ءۇشىن جۇيەلى تۇردە جۇمىس ىستەپ كەلەدى. ولار ستۋدەنتتەر اراسىندا انكەتا، الەۋمەتتىك ساۋالناما جۇرگىزىپ، تالداۋ جاسايدى. ستۋدەنتتەر شاعىمىن انونيمدى تۇردە قابىلدايدى.

«ەگەر ءبىر وقىتۋشىنىڭ اتى- ءجونى بىرنەشە رەت قايتالانسا، سول وقىتۋشىمەن جۇمىس ىستەيمىز. كەيبىرى مويىندايدى، كەيبىرى ستۋدەنتتەردىڭ سىنىن قابىلداپ، جۇمىستان شىعىپ كەتەدى. مەن 10 جىلعا جۋىق وسى ۋنيۆەرسيتەتتىڭ جەتەكشىسى بولىپ وتىرمىن جانە بۇل جىلدارى بىزدە جەمقورلىقپەن سوتتالۋ وقيعاسى بولعان جوق. ارينە، جەمقورلىقتى تۇبىرىمەن جەڭدىك دەپ ايتا المايمىز، دەگەنمەن كۇدىك تۋىنداعان باستاپقى كەزدە- اق ماماندارمەن سويلەسەمىز، سويلەسۋ مۇمكىن بولماسا، ونداي قىزمەتكەردى جۇمىستان شىعارامىز»، - دەدى ە. سىدىقوۆ.

ايتا كەتەيىك، بۇعان دەيىن ە ۇ ۋ رەكتورى 2,5-3 مىڭ ورىندىق جاڭا جاتاقحانا قۇرىلىسى باستالعانىن حابارلاعان ەدى.

اۆتور: ايجان سەرىكجان قىزى