الماتى وبلىسىندا مال ۇرىلارىمەن كۇرەس باستالدى

تالدىقورعان. قازاقپارات - الماتى وبلىسىندا «مال ۇرلىعى» جەدەل الدىن الۋ ءىس-شاراسى جۇرگىزىلۋدە، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، الدىن الۋ جانە مال ۇرلىعىنا قاتىسى بار تۇلعالاردى انىقتاۋ، سونداي-اق وسىعان ۇقساس قىلمىستاردىڭ ورىن الۋىنا جاعداي جاسايتىن سەبەپتەردى جويۋ ماقساتىندا الماتى وبلىسى اۋماعىندا 18- مامىردان باستاپ «مال ۇرلىعى» جەدەل الدىن الۋ ءىس-شاراسى جۇرگىزىلۋدە.

ءىس-شارا بارىسىندا وبلىس اۋماعىندا وسىنداي ۇرلىقتىڭ 7 دەرەگى تىركەلىپ، ولاردىڭ بارلىعى كەزەكشى تاۋلىك ىشىندە اشىلدى.

سونىمەن قاتار، ءتارتىپ ساقشىلارى بۇعان دەيىن جاسالعان مال ۇرلىعىنا قاتىستى 12 قىلمىستى اشكەرە قىلدى. قولدى بولعان 8 باس مال تابىلىپ، زاڭدى يەلەرىنە قايتارلدى.

مال ۇرلىعىن كاسىپ قىلدى دەگەن كۇدىكپەن 20 كۇدىكتى تۇلعا ۇستالىپ، 3 قىلمىستىق توپتىڭ جولى كەسىلدى. ءىس-شارا بارىسىندا 24 ەت جانە مال ونىمدەرىن ساتۋ ورىندارى تەكسەرىلدى.

58 شارۋا قوجالىعى مەن قىستاقتار تەكسەرىلىپ، مالدىڭ قاۋىپسىزىدگىن قامتاماسىز ەتۋ بويىنشا ءتۇسىندىرۋ جۇمىستارى جۇرگىزىلدى. مال جانە ەت ونىمدەرىن تاسىمالداۋشىلاردىڭ 6 كولىگى تەكسەرىلدى. وبلىستىق پوليتسەيلەر اتالعان قىلمىستىڭ الدىن الۋعا باعىتتالعان ارنايى شارالار تۇراقتى تۇردە وتكىزىلەتىنىن اتاپ ءوتتى.

ءوز كەزەگىندە، ءتارتىپ ساقشىلارى مال ۇرلىعىن بولدىرماۋ ءۇشىن ءتورت تۇلىكتى قاراۋسىز جىبەرمەۋگە، مال قورالاردا قاۋىپسىزدىك شارالارىن كۇشەيتۋگە، ال قولدى بولعان جاعدايدا شۇعىل پوليتسياعا حابار بەرۋگە كەڭەس بەردى.

ويتكەنى، ۋاقىت ءوتىپ كەتسە، بارىمتاشىلاردى انىقتاۋ قيىنعا تۇسەتىنى انىق.