قارجىلىق ماسەلەلەرگە بايلانىستى «قازمۇنايگاز» باسشىلارىنىڭ ايلىعى قىسقارماق

نۇر- سۇلتان. قازاقپارات - قارجىلىق ماسەلەلەرگە بايلانىستى «قازمۇنايگاز» ۇلتتىق كومپانياسى قىزمەتكەرلەرىنىڭ جالاقىسى قىسقارماق، دەپ حابارلايدى قازاقپارات ءتىلشىسى.

«مامىر ايىندا «قازمۇنايگاز» كومپانياسىنىڭ باسقارما شەشىمىمەن ورتالىق اپپاراتتا جالاقى تولەۋدىڭ جاڭا جۇيەسى بەكىتىلدى. ول جۇيە بويىنشا باسشىلىق قۇرامىنىڭ جالاقىسى 30 پايىزعا ازايادى. ال باسشىلىق قىزمەتتەردىڭ سانىنىڭ قىسقارۋىنا بايلانىستى تومەنگى لاۋازىمعا تاعايىندالاتىن ورتا بۋىندى مەنەدجەرلەردىڭ جالاقىلارى 20 پايىزعا تومەندەيدى. باسقا - قاتارداعى قىزمەتكەرلەردىڭ جالاقىسى بۇرىنعى دەڭگەيدە ساقتالادى» ، - دەدى «قازمۇنايگاز» ۇ ك» ا ق ادامي رەسۋرستاردى باسقارۋ جونىندەگى اتقارۋشى ديرەكتورى داۋلەتجان حاسانوۆ و ك ق- دا وتكەن باسپا ءسوز ءماسليحاتىندا.

سونىمەن بىرگە، داۋلەتجان حاسانوۆ «قازمۇنايگاز» كومپانياسى قارجىلىق جاعدايعا بايلانىستى سىياقىدان باس تارتقانىن ءمالىم ەتتى.

«جىل سوڭىنا دەيىن ەشقانداي سىياقى نەمەسە بونۋستار تولەنبەيدى. مۇناي نارىعىندا قالىپتاسقان جاعداي قانشالىقتى قيىن بولسا دا ءبىز ءاربىر قىزمەتكەردىڭ، ولاردىڭ وتباسىنىڭ الدىنداعى الەۋمەتتىك جاۋاپكەرشىلىگىن تولىق سەزىنەمىز. سوندىقتان «سامۇرىق- قازىنا» ۇلتتىق ءال- اۋقات قورىنىڭ تاپسىرماسى بويىنشا الەۋمەتتىك جاۋاپكەرشىلىك بويىنشا باعدارلاما ازىرلەدىك. وسى باعدارلاماعا سايكەس ءبىز جۇمىسسىز قالعان قىزمەتكەرلەرگە بارىنشا قولداۋ كورسەتەمىز» ، - دەدى ول.

ەسكە سالا كەتسەك بۇعان دەيىن داۋلەتجان حاسانوۆ كومپانيادا داعدارىسقا قارسى ستراتەگيا جاسالىپ جاتقانىن ءمالىم ەتكەن بولاتىن.