ەلوردادا ماساعا قارسى دەزينسەكتسيا قالاي جۇرگىزىلۋدە

نۇر- سۇلتان. قازاقپارات - نۇر- سۇلتاندا شىبىن- شىركەي، ماسا جانە باسقا دا جاندىكتەرگە قارسى دەزينسەكتسيا ەكى اۋىسىممەن جۇرگىزىلىپ جاتىر، دەپ حابارلايدى قازاقپارات قالا اكىمدىگىنە سىلتەمە جاساپ.

بيىل دەزينسەكتسيا جاسالاتىن تەرريتوريا كەڭەيگەن. ماسەلەن، ماسادان تازارتىلاتىن اۋماق - %20، تازارتىلاتىن سۋ قويمالارى% 25 ۇلعايدى. بۇگىنگە دەيىن ماساعا قارسى 230 ميلليون شارشى مەتر اۋماق زالالسىزداندىرىلدى. اۋقىمدى جۇمىسقا ەنتومولوگ ماماندار مەن دەزينسەكتورلار جۇمىلدىرىلدى.

«ءبىر ماسا ورتا ەسەپپەن 300-400 گە دەيىن دەرناسىل سالادى. دەزينسەكتسيا ەكى اۋىسىممەن ءجۇرىپ جاتىر. ءبىرىنشى اۋىسىم - ساعات تاڭعى 05.00 دەن 12.00 گە دەيىن، ال ەكىنشى اۋىسىم - كەشكى 20.00 دەن تۇنگى 02.00 گە دەيىن. ءبىزدىڭ جۇمىسىمىز ماسانى تۇبەگەيلى جويۋدى ەمەس، سانىن ازايتۋدى كوزدەيدى» ، - دەدى دەزينسەكتور ەركەبۇلان جالعاس.

اتاپ وتىلگەندەي، سۋ ايدىندارىن تازارتۋعا ەرەكشە ءمان بەرىلەدى. سونىمەن بىرگە قالا ىشىندەگى اۋلالار مەن قوعامدىق ورىندار (كوشەلەر، ساياباقتار مەن گۇلزارلار) زالاسىزداندىرىلادى.

«تاياز سۋ ايدىندارىن وڭدەۋدىڭ ەكىنشى كەزەڭىن باستادىق. قازىردىڭ وزىندە 400 گەكتار تازارتىلدى. بۇل ماسالاردىڭ دەرناسىل تۇرىندە سۋ ايدىندارىنان ۇشىپ كەتۋىنە جول بەرمەۋ ءۇشىن جاسالادى» ، - دەدى «ەلوردالىق دەزينفەكتسيا» ج ش س- ءنىڭ سارىارقا اۋدانى بويىنشا مەڭگەرۋشىسى انتونينا ماسلوۆا.

ماسا مەن شىركەيگە قارسى كۇرەستە مەكتەپ، بالاباقشا، دەنساۋلىق ساقتاۋ نىساندارى، ساۋدا ۇيلەرى مەن ت. ب. جەرلەردى دەر كەزىندە دەزينسەكتسيالاۋ ماڭىزدى. جۇمىس كۇن سايىن جۇرۋدە.