بيىل ەلوردادا بەس ەلدىمەكەن گازبەن قامتاماسىز ەتىلەدى
ەلوردانى ودان ءارى دامىتۋ جونىندەگى كەڭەستە مەملەكەت باسشىسى قاسىم-جومارت توقايەۆ قالانى گازداندىرۋ پروتسەسىن باقىلاۋعا الۋدى تاپسىردى.
«ەلوردانى گازداندىرۋ — ەلباسىنىڭ تاريحي جوباسى. جەلەزنودوروجنىي ەلدى-مەكەنىندە گازبەن جابدىقتاۋدىڭ %80 دان استام تاراتۋ جەلىسى سالىندى. سونداي-اق، كوكتال-1، كوكتال-2، پرومىشلەننىي جانە اگروگورودوك ەلدى- مەكەندەرىندە گاز وتكىزۋ جۇمىستارى جۇرگىزىلىپ جاتىر. وڭتۇستىك-شىعىس (وڭ جاعى)، وڭتۇستىك-شىعىس (سول جاعى) ىقشام اۋداندارىندا جۇمىس باستالدى. كوكتال-1، جەلەزنودوروجنىي ەلدىمەكەندەرىنىڭ الەۋمەتتىك نىساندارى مەن تەمىرجول جەلىسىن گازعا جازدا قوسامىز»، - دەدى قالا اكىمى التاي كولگىنوۆ.
ول «جەلەزنودوروجنىي» ەلدىمەكەنىنىڭ تۇرعىندارى گاز تارتۋ ەكولوگياعا جاقسى اسەر ەتىپ، جەكە سەكتور تۇرعىندارىنىڭ ءومىرىن ەداۋىر جەڭىلدەتەتىنىن اتاپ ءوتتى.
«ءبىز الداعى جىلۋ بەرۋ ماۋسىمىندا كومىر جاقپايتىنىمىزعا قۋانامىز. كومىردى قايدان ساتىپ الۋ، ونىڭ ساپاسى، ونى قايدا ساقتاۋ جايىن ەندى ويلامايمىز. جىلۋ بەرۋ ماۋسىمىندا جەكە سەكتوردىڭ تۇرعىندارى ۇيدەن شىعا المايتىن ەدىك. ۇيدە بولماعاندا كورشىلەرىمىز بەن تۋىستارىمىزدان پەشكە كومىر سالىپ بەرۋىن سۇرايتىنبىز. ەندى مۇنداي پروبلەما بولمايدى. سونىمەن قاتار گازداندىرۋ ەكولوگيانى ايتارلىقتاي جاقسارتادى جانە ازاماتتاردىڭ دەنساۋلىعىنا جاعىمدى اسەر ەتەدى»، - دەدى بولات مۇقاتايەۆ.
ونەركاسىپتىك سەكتور مەن ەلدى-مەكەندەردى گازداندىرۋ 3 كەزەڭدە وتەدى. بيىلعى جىلىتۋ ماۋسىمىندا كوكتال-1، كوكتال-2، اگروگورودوك، پرومىشلەننىي، جەلەزنودوروجنىي ەلدىمەكەندەرى گازبەن قامتاماسىز ەتىلەدى. وڭتۇستىك-شىعىس تۇرعىن ءۇي الابىندا جۇمىس باستالادى.
ەكىنشى كەزەڭدە ميچۋرينو، ينتەرناتسيونالنىي، كۇيگەنجار (1-2 پ ك)، تەلمان (3 پ ك)، پريگورودنىي، Garden Village جانە Family Village (4 پ ك) ەلدىەكەندەرىندە وتەدى.
ءۇشىنشى كەزەڭدە يلينكا (1-2-د ك)، شۇبار (3-د ك)، ءوندىرىس (4-د ك) تۇرعىن الاپتارى گازداندىرىلادى.
جوبانى ىسكە اسىرۋ مەرزىمى - 2020-2023-جىلدارعا ەسەپتەلگەن. گاز وتكىزۋ اۋاداعى زياندى قالدىقتىڭ 6 ەسەگە، قاتتى زاتتاردىڭ - 40 مىڭ تونناعا دەيىن ازايۋىنا مۇمكىندىك بەرەدى.