نۇر-سۇلتانداعى كارانتين قايتادان كۇشەيتىلۋى مۇمكىن
«كوپتەگەن تۇرعىنداردىڭ ماسكا تاعۋ ءتارتىبىن بۇزىپ جاتقانىن كورىپ وتىرمىز. كوروناۆيرۋس ىندەتى باستالعان ساتتەن بەرى ماسكا تاعۋدىڭ ماڭىزدى ەكەنىن ايتىپ كەلەمىز. ونىڭ ۇستىنە، سوڭعى كەزدەرى اۋرۋ جۇقتىرۋ جاعدايى جيىلەپ كەتتى. رەسمي تاكسوپارك قىزمەتكەرلەرى دە، قوعامدىق ورىنداعى تۇرعىندار دا ماسكا تاعۋ رەجيمىن ۇستانبايدى. سوندىقتان بارلىق سۇحباتتارىمىزدا ماسكا تاعۋ قاجەتتىگىن ايتىپ ءجۇرمىز»، - دەدى زەكەن يساقوۆ قازاقپارات تىلشىسىنە بەرگەن سۇحباتىندا.
سونىمەن بىرگە، سپيكەر ەلوردادا كارانتيندىك شارالاردىڭ كۇشەيۋى مۇمكىن ەكەندىگىن ايتتى.
«ماسكالىق رەجيمدى ۇستانباۋدىڭ اقىرى بۇرىنعى پوزيتسياعا قايتا ورالۋعا اكەپ سوعادى. دەمەك، نۇر-سۇلتاندا قايتادان كارانتيندىك رەجيمدى كۇشەيتۋگە ءماجبۇر بولامىز. بۇل ەڭ الدىمەن مەديتسينالىق قىزمەتكەرلەرگە ەمەس، تۇرعىنداردىڭ ءوز جاۋاپكەرشىلىگىنە بايلانىستى بولماق. سانيتارلىق نورمالاردى ساقتاماۋدىڭ ءوزى كارانتيندىك شارالاردى كۇشەيتۋگە سەبەپ بولا الادى»، - دەدى زەكەن يساقوۆ.
ايتا كەتەيىك، بۇعان دەيىن ەلوردا تۇرعىندارى سانيتارلىق نورمالاردى ساقتاماسا، قوعامدىق كولىك قىزمەتى قايتا توقتاۋى مۇمكىن ەكەندىگى حابارلانعان ەدى.