نۇر-سۇلتاندا دارىگەرلەر مەن مۇعالىمدەرگە الەۋمەتتىك باسپانا سالىنادى

نۇر-سۇلتان. قازاقپارات - ەلوردا اكىمى التاي كولگىنوۆ الەۋمەتتىك باسپانا قۇرىلىسىمەن تانىستى.

ولاردىڭ ءبىرقاتارى - قۇرىلىسى اياقسىز قالعان ۇيلەر، دەپ حابارلايدى قازاقپارات قالا اكىمدىگىنە سىلتەمە جاساپ.

وسىلايشا، مىڭنان استام پاتەر مۇعالىم، دارىگەر سىندى بيۋجەتتىك سالا جۇمىسشىلارىنا بولىنەدى.

مەملەكەت باسشىسىنىڭ تاپسىرماسىمەن بيىل قۇرىلىس كولەمى ۇلعايتىلدى. جىل سوڭىنا دەيىن نۇر-سۇلتاندا 8 مىڭنان استام پاتەر سالىنباق.

«ازاماتتاردى قابىلداۋدا كوتەرىلەتىن نەگىزگى ماسەلەلەردىڭ ءبىرى - الەۋمەتتىك باسپانا. جەڭىلدىكپەن بەرىلەتىن پاتەرلەرگە ەرەكشە كوڭىل بولەمىز. وتكەن جىلدان بەرى بەلسەندى جۇمىس ىستەپ كەلەمىز. قىستا بالىق قاجەتتى قۇجاتتارمەن اينالىسىپ، قۇرىلىس ماۋسىمىندا ىسكە كىرىسۋدى كوزدەدىك. جەكە قابىلداۋىمدا تۇرعىندار جالدامالى پاتەردى 5 جىلدان كەيىن بوساتۋ ماسەلەسىنە دە الاڭداۋشىلىق ءبىلدىردى. ارەندالىق باسپانا - كەزەكتە تۇرعان ادامداردىڭ 5 جىلدان كەيىن بوساتۋىن بىلدىرمەيدى. تەك 5 جىل سايىن كەلىسىمشارتتى ۇزارتىپ وتىرۋ قاجەت. تەك جۇمىس ىستەيتىن جاستاردىڭ ارەندالىق باسپاناسى 5 جىلدا قايتارىلۋى ءتيىس. سەبەبى ولار 5 جىلدا اياققا تۇرىپ، وزگە باسپانالىق باعدارلامالارعا قاتىسادى»، - دەدى ا. كولگىنوۆ.

ازىرگە بيىل نۇر-سۇلتاندا 500 مىڭ شارشى مەتردەن استام الەۋمەتتىك باسپانا پايدالانۋعا بەرىلدى.

بۇلار كەزەكتە تۇرعاندارعا (حالىقتىڭ از قامتىلعان بولىگىنە) جانە تۇرعىن ءۇي قۇرىلىس جيناق بانكى سالىمشىلارىنا ارنالعان.