تارازدىق وقۋشى الەمنىڭ ۇزدىك يننوۆاتسيالىق جوعارى وقۋ ورنىنا شاقىرتۋ الدى
ايتا كەتەيىك، جىل سايىن اتالعان ۋنيۆەرسيتەتكە ءتۇسۋ مۇمكىندىگىنە قۇجات تاپسىرعان تالاپكەرلەردىڭ 1-2 پايىزى عانا يە بولا الادى. سولاردىڭ ءبىرى - دايانا. ەندى زياتكەردىڭ 4 جىل ىشىندە 7 مەملەكەتتە ءبىلىم الىپ، ساياحاتتاۋعا مۇمكىندىگى بار.
اتاپ ايتقاندا، تارازدىق تالاپكەر ءبىرىنشى كۋرستى سان-فرانتسيسكودا وقىسا، ەكىنشى كۋرستان باستاپ سەۋل، گيدروباد، بۋەنوس-ايرەس، بەرلين، لوندون جانە تايپەيدە وقيتىن بولادى.
وقۋ ورداسىنىڭ باستى ەرەكشەلىگى وسىندا. ستۋدەنتتەر ەل ارالاپ ءجۇرىپ، ءبىلىم مەن تاجىريبە جيناقتايدى.
«مينەرۆا ۋنيۆەرسيتەتى الەمدەگى ەڭ تومەن ءتۇسۋ پايىزىمەن تانىمال. شاقىرۋ قاعازى كەلگەندە، قاتتى تاڭقالدىم. بالا كۇنىمنەن الەمدى ارالاپ، ءتۇرلى مادەنيەت پەن سالت-ءداستۇردىڭ كۋاسى بولۋدى ارماندايتىنمىن. سوندىقتان مينەرۆا مەن ءۇشىن ساپالى بىلىممەن قاتار، باعا جەتپەس تاجىريبە الۋعا مۇمكىندىك بەرەتىنىنە سەنىمىم مول»، - دەيدى د. بەستەرەكوۆا.
دايانا مەكتەپ قابىرعاسىندا وقىپ ءجۇرىپ، ەرىكتى رەتىندە شارالارعا بەلسەنە ارالاسا باستاعان. ول سانكت-پەتەربۋرگ قالاسىندا وتكەن «ۇرپاقتار ديالوگى»، USAID ۇيىمداستىرعان حالىقارالىق فورۋمدارىنىڭ بەلسەندى قاتىسۋشىسى.
بوس ۋاقىتىندا وقۋشىلاردى وليمپياداعا دايىنداپ، حورەگرافيامەن دە اينالىسىپ ۇلگەرەدى. سۋرەت سالىپ، قولونەر بۇيىمدارىن جاساعاندى ۇناتادى. سونىمەن قاتار، زياتكەر امەريكالىق FLEX باعدارلاماسىنىڭ تۇلەگى. باعدارلاما اياسىندا 100 ەرىكتىلىك ساعاتىن ورىنداپ، سەرتيفيكاتقا يە بولعان.
امەريكالىق مەكتەپ اتىنان جەڭىل اتلەتيكا جارىستارىنا دا بىرنەشە رەت قاتىسقان. بولاشاعىن قوعامدىق عىلىمدار مەن بيزنەسكە ارناعىسى كەلەتىن دايانانىڭ ارمانى بيىك. شەتەلدەن ورالعان سوڭ، ەلدەگى الەۋمەتتىك بيزنەس سالاسىن دامىتۋدى كوزدەيدى.