ينتەرنەتسىز وتىرعان الماتى وبلىسىنىڭ تۇرعىندارى مۇنارا قۇراستىردى

تالدىقورعان. قازاقپارات - الماتى وبلىسىندا ينتەرنەتسىز وتىرعان بەرىكتاس اۋىلىنىڭ تۇرعىندارى ۇيالى بايلانىس تاراتۋشى قۇرىلعى ورناتاتىن مۇنارانى وزدەرى قۇراستىردى.

ەندى بيىكتىگى 21 مەتر قوندىرعىنى كوتەرۋ ءۇشىن ارنايى تەحنيكا قاجەت، دەپ حابارلايدى قازاقپارات ءتىلشىسى.

70 كە جۋىق وتباسى بار بەرىكتاس اۋىلىندا 84 وقۋشى وقيدى. كارانتين كەزىندە اۋىلدىڭ 20 عا جۋىق ستۋدەنتى كەلدى. عالامتوردىڭ جوقتىعى بالالاردىڭ ونلاين ءبىلىم الۋىن قيىنداتتى. وسىعان الاڭداعان اتا-انالار ۇيالى بايلانىس وپەراتورلارىنا وزدەرى شىققان.

ول جەردە شاعىن اۋىلعا عالامتور تارتۋ ءتيىمسىز ەكەنىن العا تارتىپ، وزدەرىنە مۇنارا جاساتۋدى ۇسىنعان. اۋىلداعى اعايىن بىرىگىپ، ءبىر اي كولەمىندە تەمىر جيناپ، 21 مەترلىك مۇنارا قۇراستىردى.

اۋەل باستا تۇرعىندار مۇنارانى قالاعا تاپسىرىس بەرىپ جاساتپاق بولعان. الايدا كاسىپورىندا بۇل جۇمىستى 3 ميلليون تەڭگەدەن استام قارجىعا باعالاعان.

«ءبىر اي بولدى عوي وسى «ۆىشكامەن» اينالىسقالى بەرى. ەندى جاساۋىن جاسادىق. وسىنى تۇرعىزاتىن كران كەرەك بولىپ تۇر. سول كرانعا قينالىپ جاتىرمىز. ايتپەسە ءبارى دايىن بولىپ تۇر. 100 مىڭنان استام اقشا سۇرايدى. وعان تاعى دا جينايمىز با، بىلمەي وتىرمىز؟»، - دەيدى اۋىل تۇرعىنى ەرىك ءنۇسىپوۆ.

ال اۋىل اكىمى ءاليا باقتياروۆا بايلانىس وپەراتورى كەلىپ ينتەرنەت جەلىسىن قوسىپ بەرەتىنىن مالىمدەدى. سونداي-اق، «مۇنارا ورنالاسقان جەر تەلىمىن، مەملەكەتتىك اكتىلەرىن جانە دە باسقا قۇجاتتارىن ءوزىم رەتتەپ بەرەمىن» دەپ سەنىم ءبىلدىردى.