ۇيالى بايلانىس وپەراتورلارىنا تولەم تولىق ءبىر ايعا جاسالاتىن تاريف قۇرۋ مىندەتتەلدى

نۇر- سۇلتان. قازاقپارات - ۇيالى بايلانىس وپەراتورلارىنا تولەم تولىق ءبىر كۇنتىزبەلىك ايعا جاسالاتىن تاريفتىك جوسپار قۇرۋ مىندەتتەلدى، دەپ حابارلايدى قازاقپارات.

ق ر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ۇيالى بايلانىس قىزمەتتەرىن كورسەتۋ قاعيدالارىن وزگەرتتى. ەندى ءموبيلدى وپەراتورلار ابونەنتتەرگە وزگە تاريفتىك جوسپارلارمەن قاتار، تولەم ءبىر كۇنتىزبەلىك ايعا جاسالاتىن تاريفتىك جوسپاردى دا ۇسىنۋى ءتيىس. وزگەرتۋلەردىڭ ارقاسىندا ابونەنتتەر تاريفتىك جوسپارلاردىڭ ىشىنەن وزىنە قاجەتىن تاڭداي وتىرىپ، ونى تولىق ءبىر اي پايدالانا الادى. مىسالى، ەگەر ابونەنت تاريفتىك جوسپارعا ايدىڭ سوڭعى كۇنى قوسىلسا ونىڭ جەكە شوتىنان بايلانىس قىزمەتى ءۇشىن تولەم كەلەسى ايدىڭ سوڭعى كۇنى شەگەرىلەدى. سونىمەن قاتار، اتالعان تاريفتىك جوسپارداعى قىزمەتتەر كولەمى اياقتالعاننان كەيىن وپەراتور ابونەنتتىڭ كەلىسىمىنسىز قىزمەتتىڭ قوسىمشا كولەمى ءۇشىن اقى الا المايدى. مۇنىمەن قوسا، ەرەجەگە «بازالىق تاريفتىك جوسپار» ۇعىمى ەنگىزىلدى.

بۇل تاريف ابونەنتتىك تولەمدى تالاپ ەتپەيدى، تەك ناقتى پايدالانعان مينۋت نەمەسە SMS سانىنا عانا تولەم جاساي وتىرىپ، قوڭىراۋ شالۋعا جانە SMS جىبەرۋگە مۇمكىندىك بەرەدى. «بازالىق تاريفتىك جوسپار» ابونەنت ءنومىردى باسقا ۇيالى بايلانىس وپەراتورىنىڭ جەلىسىنە اۋىستىرعاندا (MNP قىزمەتى) ، جاڭا تاريفتىك جوسپاردى تاڭداپ ۇلگەرمەگەندە، سونداي- اق قولدانىستاعى تاريفتىك جوسپار ارەكەت ەتۋىن توقتاتقان جاعدايدا قوسىلادى. بۇعان دەيىن ۇيالى بايلانىس وپەراتورى ابونەنتتە قانداي دا ءبىر تاريفتىك جوسپار بولماسا، ونى وزدەرى ابونەنتتىڭ كەلىسىمىنسىز كەز- كەلگەن تاريفتىك جوسپارعا قوسا الاتىن. بايلانىس وپەراتورلارى «بازالىق تاريفتىك جوسپارعا» وزگەرىستى جىلىنا ءبىر رەت قانا ەنگىزە الادى جانەبۇل تۋرالى ول ابونەنتتى ناقتى وزگەرىستەرگە دەيىن كۇنتىزبەلىك وتىز كۇن بۇرىن حاباردار ەتۋگە مىندەتتى.