ءار ناۋقاسقا ءبىرىنشى كەزەكتە مەيىرىم قاجەت - مەدبيكە

تالدىقورعان. قازاقپارات - تالدىقورعانداعى وبلىستىق كوپسالالى ونكولوگيالىق كلينيكادا مەدبيكە بولىپ ىستەيتىن قۇندىز بەكتۇروۆا ءار ناۋقاسقا ءبىرىنشى كەزەكتە مەيىرىم قاجەتتىلىگىن ايتادى.

كوپ جىل مەدبيكە بولىپ ىستەپ كەلە جاتقان قۇندىز بەكتۇروۆا ءوزى قاتىسقان العاشقى وپەراتسيانى ەسكە الدى.

ونىڭ ايتۋىنشا، ناۋقاستىڭ سول كەزدە اسقازانىن تولىقتاي الىپ تاستاعان.

«ول وتانىڭ جاسالعانىنا دا 22 جىل ءوتتى. العاش رەت جۇمىسقا ورنالاسقان كەزىم ەدى. جازىلمايتىن دەرتكە شالدىققان ناۋقاستىڭ تولىقتاي اسقازانىن كوز الدىمدا الىپ تاستادى. ارينە وتادا قاتتى قورىقتىم. كۇردەلى وتا بولعاندىقتان ناۋقاس ءومىر سۇرمەيتىن شىعار دەگەن وي كەلدى. ءبىراق، مەن قاتەلەسىپپىن. وتادان كەيىن ول ادام 15 جىل ءومىر ءسۇردى. سوندىقتان قاتەرلى ىسىككە شالدىققان جاندار بىردەن كۇيزەلىسكە تۇسپەسە ەكەن دەپ تىلەيمىن. سەبەبى، دەر كەزىندە دارىگەرگە قارالسا، دەرتپەن كۇرەسۋگە بولادى»، - دەيدى قۇندىز بەكتۇروۆا.

قۇندىز ول كەزدە نەبارى 23 جاستا عانا بولىپتى. تاباندىلىق، جۇمىسىنا دەگەن سۇيىسپەنشىلىكتىڭ ارقاسىندا ول ونكولوگيالىق كلينيكادا 22 جىلدان بەرى ىستەپ كەلەدى.

«قاتەرلى ىسىك جايلى بىلگەندە ناۋقاستاردىڭ باسىم بولىگى بىردەن كۇيزەلىسكە تۇسەدى. جىلايدى. قينالادى. سول كەزدە ءبىز ولارعا ەمدىك شارالارمەن قاتار، پسيحولوگيالىق كومەك تە كورسەتەمىز. ءار ناۋقاستىڭ ساۋىعىپ كەتۋىن تىلەۋمەن جۇرەمىز. ارينە مۇنداي جەردە جۇمىس ىستەۋ وڭاي ەمەس. كوز الدىمىزدا ولار ءومىر مەن ءولىم اراسىندا ارپالىسادى. حيميا العان ساتتە جاندارى قينالعان ناۋقاستاردىڭ شاشى ءتۇسىپ، دەنەلەرىندە ىسىك تە پايدا بولىپ جاتادى. ءبىراق ولار ءومىر ءۇشىن كۇرەسىپ، دەرتتى دە كوپ جاعدايدا جەڭىپ شىعادى. ەڭ باستىسى ءۇمىت ۇزىلمەۋ كەرەك دەپ سانايمىن. ءار ادام ءوز دەنساۋلىعىنا نەمقۇرايدى قاراماسا دەپ تىلەيمىن»، - دەدى جانى مەيىرىمگە تولى مەدبيكە.

قۇندىز التاي قىزى جۇمىس ىستەيتىن جەردە 80 گە جۋىق مەدبيكە بار. ول باس مەدبيكە قىزمەتىن اتقارادى. ءار مامانعا جۇمىسقا مەيىرىمدىلىكپەن قاراۋ كەرەكتىگىن ءجيى قايتالايمىن دەيدى.

«بىزدە باسقا اۋرۋحانالارداعىداي ەمەس، جاعداي باسقاشا. قاتەرلى ىسىككە شالدىققان جانداردى ەمدەيمىز. سول سەبەپتى، مەدبيكەلەردەن ءار كەز ءوز جۇمىستارىنا شىدامدىلىق تانىتۋدى سۇرايمىن. سەبەبى، ءار ناۋقاسقا ءبىرىنشى كەزەكتە مەيىرىم قاجەت. ءتىپتى كەيدە ەمدىك شارالاردان باس تارتىپ، ءبىزدى ۇرىپ جىبەرەتىن دە ساتتەر بولادى. ونىڭ بارلىعىنا تەك تۇسىنىستىك تانىتامىز»، - دەدى ق. التاي قىزى.

قۇندىز بەكتۇروۆا تالدىقورعانداعى بۇرىڭعى مەديتسينالىق ۋچيليشەنى (قازىر اتاۋى مەديتسينالىق كوللەدج) بىتىرگەن.

قازىر ەكى بالانىڭ اناسى. قىزى الماتى وبلىستىق ەكولوگيا دەپاتامەنتىندە باس مامان بولىپ جۇمىس ىستەيدى. ال ۇلى الماتىداعى «نارحوز» ۋنيۆەرسيتەتىنىڭ 3- كۋرس ستۋدەنتى. الماتى وبلىسىنداعى اقسۋ اۋدانىنا قاراستى ماتاي اۋىلىندا دۇنيەگە كەلگەن مەدبيكە ءار مامان جۇمىستا تاباندىلىق تانىتۋ كەرەك دەگەن ۇستانىمدا.

سوندا ەڭبەكتىڭ دە جەمىستى بولاتىنىنا ول سەنىمدى. قۇندىز بەكتۇروۆا قازىر ءوزى ءبىلىم العان شاڭىراقتا دا ستۋدەنتتەرگە ءدارىس وقىپ، ءبىلىمدى ۇرپاق تاربيەلەۋگە ءوز ۇلەسىن قوسۋدا.