قازاقستاندىق انشىلەر حالىقارالىق جوباعا قاتىسىپ، «تىرنالار» ءانىن شىرقادى

نۇر-سۇلتان. قازاقپارات - تانىمال ءۇش باريتون «تىرنالار» حالىقارالىق جوباسىنا قاتىستى.

«استانا وپەرانىڭ» جەتەكشى سوليسى، قازاقستاننىڭ ەڭبەك سىڭىرگەن قايراتكەرى تالعات مۇسابايەۆ، رەسەي ۇلكەن تەاترىنىڭ شاقىرىلعان سوليسى ۆاسيلي لاديۋك، اباي اتىنداعى ماوبت ءسوليسى راسۋل جارماعامبەتوۆ «استانا وپەرا» تەاترى وپەرا ترۋپپاسىنىڭ باس كونسەرتمەيستەرى ەلەنا ساحنونىڭ، «استانا وپەرا» سيمفونيالىق وركەستر مۋزىكانتتارى مەن حور ارتىستەرىنىڭ سۇيەمەلدەۋىمەن ايگىلى «تىرنالار» ءانىن ونلاين ورىندادى، دەپ حابارلايدى قازاقپارات تەاتردىڭ باسپا ءسوز قىزمەتىنە سىلتەمە جاساپ.

بۇل ءان راسۋل عامزاتوۆتىڭ سوزىنە جازىلعان كومپوزيتور يان فرەنكەلدىڭ قالامىنا تيەسىلى (ورىس تىلىنە اۋدارعان - ناۋم گرەبنيەۆ). تۋىندى سوعىس كەزىندە قازا تاپقان ساربازدارعا ارنالعان. «ارىپتەستەرىممەن بىرگە وسىناۋ اڭىزعا اينالعان كومپوزيتسيانى ورىنداۋ مەن ءۇشىن ۇلكەن قۋانىش بولدى. ونەردىڭ شەكاراسى جوق، مۋزىكا ادامداردى جاقىنداستىرادى، ءدىني سەنىم مەن ۇلتقا قاراماستان، بۇل - ءبىزدىڭ ورتاق مەرەكەمىز. 9-مامىردى قۋانا-قۋانا قارسى الامىز، سەبەبى بۇل - بارشامىزعا ورتاق تاريح، ونى ەستەن شىعارۋعا بولمايدى. بەيبىت ءومىر ءۇشىن كۇرەسكەن باتىرلارىمىز ماڭگى ەسىمىزدە، ولاردى ماقتان تۇتامىز، ولار ءوز وتانىن قورعاپ، جانىن قيۋعا دايىن بولعان. بۇل جوبا - سوعىس جولىن ءجۇرىپ وتكەن بابالارىمىزدىڭ رۋحىنا تاعزىم ەتىپ، ەسكە الۋ جانە بۇگىندە قاسىمىزدا قالعان ازعانا باتىرلارىمىزعا قۇرمەت كورسەتۋ. ولارعا مىقتى دەنساۋلىق تىلەي وتىرىپ، باقىتتى دا باياندى ءومىرىمىز ءۇشىن جاساعان ەرلىكتەرىنە مىڭ العىس بىلدىرەمىز»، - دەيدى تالعات مۇسابايەۆ.

تالعات مۇسابايەۆ - قازاقستاننىڭ ەڭبەك سىڭىرگەن قايراتكەرى، رەسەيدىڭ ۇلكەن تەاترى ساحناسىندا پ. چايكوۆسكيدىڭ «ەۆگەني ونەگين» وپەراسىندا ونەگيننىڭ پارتياسىن ورىنداعانىن ەستەرىڭىزگە سالا كەتەيىك (ماسكەۋ، 2003).

يتاليانىڭ ريم، گەنۋيا، فلورەنسيا، سيراكۋزى جانە ت. ب. قالالارىندا تالاي رەت گاسترولدىك ساپارلاردا بولعان. ا ق ش- تا، الەمنىڭ ەڭ بەدەلدى ساحنالارىنىڭ ءبىرى كارنەگي-حولل (نيۋ-يورك ق. ) جانە كەننەدي ورتالىعىندا (ۆاشينگتون ق. ) كونسەرتتەرمەن ونەر كورسەتەدى. ونىڭ ارىپتەسى ۆاسيلي لاديۋك - رەسەيلىك وپەرا ءانشىسى. شاقىرىلعان سوليست رەتىندە رەسەي مەن الەمنىڭ ماڭدايالدى وپەرا تەاترلارىنداعى (ۇلكەن تەاتر، ماريين تەاترى، مەتروپوليتەن وپەرا، حيۋستون گراند وپەرا، لا فەنيچە تەاترى (ۆەنەتسيا)، نورۆەگيا كورولدىك وپەراسى، Teatro Regio (تۋرين) جانە ت. ب. ) وپەرالىق قويىلىمدارعا قاتىسادى. ۆالەري گەرگيەۆ، پلاسيدو دومينگو، ۆلاديمير سپيۆاكوۆ سىندى كورنەكتى ديريجەرلەر جانە رەجيسسەرلەرمەن بىرگە ىنتىماقتاستىقتا جۇمىس جاساعان.

ۆاسيلي لاديۋكتىڭ شەتەلدە ونەر كورسەتۋ گەوگرافياسى ميلان مەن لوندون، ۆەنەتسيا مەن تۋرين، بريۋسسەل مەن وسلو، نيۋ-يورك پەن توكيو قالالارىن قامتيدى. جوبانىڭ ءۇشىنشى قاتىسۋشىسى راسۋل جارماعامبەتوۆ - اباي اتىنداعى ماوبت سوليسى، قازاقستان مەن ونىڭ شەكاراسىنان تىس ونداعان بايقاۋلاردىڭ جەڭىمپازى ءارى كوپتەگەن جۇلدەلەردىڭ يەگەرى بولىپ تابىلادى.

وپەرا ءانشىسى بيبىگۇل تولەگەنوۆانىڭ VIII حالىقارالىق بايقاۋىنىڭ گران-پري يەگەرى، ۇلان- باتىرداعى حالىقارالىق ۆوكاليستەر بايقاۋىنىڭ III سىيلىق لاۋرەاتى، Plácido Domingo’s Operalia, The World Opera Competition 2017 دۇنيەجۇزىلىك بايقاۋى جانە The Queen Sonja International Music Competition بايقاۋىنىڭ جارتىلاي فيناليسى.

جوبانىڭ مەنەدجەرى ءارى شابىتتاندىرۋشىسى ەلەنا ساحنونىڭ ايتۋىنشا، 5 جىل بۇرىن 9-مامىر كۇنى ەرەكشە مەيرامعا اينالعان، سەبەبى ول ءوزىنىڭ اتاسى ۆاسنەتسوۆ ەۆگەني ميحايلوۆيچتىڭ كوپتەگەن قازاق جاۋىنگەرلەرى قايتىس بولعان لەنينگراد تۇبىندەگى جانتۇرشىگەرلىك شايقاستا باسىن قاتەرگە تىككەنىن بىلگەن.

«تىرنالار» - كۇردەلى ءان، سەبەبى ءبىز ونىڭ قاھارماندارىنىڭ تاعدىرىن سەزىنەمىز، قامىعامىز. سوعىس - بۇل قاسىرەت، ول كوپتەگەن جانداردىڭ ءومىرىن الىپ كەتتى، وتباسىلاردى بۇزدى، ادامداردى مۇگەدەك ەتتى. ولاردىڭ ىشىندە - ءبىزدىڭ جاقىندارىمىز بەن تۋىستارىمىز دا بار. وسى تۋىندىنى ورىنداي وتىرىپ، ۇلى وتان سوعىسىندا وسىناۋ جەڭىستى الىپ كەلگەن جانداردىڭ بارلىعىن ەسكە الامىز.

ارداگەرلەرىمىز جىل سايىن وسى مەرەكەلىك كۇندە ءبىزدىڭ نازارىمىزدى كۇتەدى، سوندىقتان ءبىز، مۋزىكانتتار، ۇلى وتان سوعىسىندا كورسەتكەن ولاردىڭ باتىرلىعى مەن ەرلىگى ءۇشىن ءوز شىعارماشىلىعىمىزبەن ارداگەرلەرىمىزگە شەكسىز العىسىمىزدى بىلدىرگىمىز كەلەدى»، - دەپ اتاپ ءوتتى «استانا وپەرا» جەتەكشى سوليسى تالعات مۇسابايەۆ.

جوبا قازاقستانداعى رەسەي ىنتىماقتاستىق وكىلدىگىمەن بىرلەسىپ جۇزەگە اسىرىلعان. جىل سايىن «استانا وپەرا» موبت جەڭىس كۇنىنە وراي قۇرمەتتى قوناقتار - ۇلى وتان سوعىسى ارداگەرلەرىمەن كونتسەرتتەر وتكىزەتىن. كارانتينگە قاراماستان تەاتر ۇجىمى جەڭىستىڭ 75 جىلدىعى قارساڭىندا سوعىس ارداگەرلەرى مەن تىڭ ەڭبەككەرلەرىن ەلەۋسىز قالدىرماي، سىي-سىياپات ۇسىندى، ولار سىيلىقتارعا وتە قۋانىشتى بولىپ، تەاتر قىزمەتكەرلەرىنە العىستارىن ءبىلدىردى.