ش ق و-دا قۇنانباي مۋزەيىنىڭ قۇرىلىسى باستالدى

وسكەمەن. قازاقپارات - شىعىس قازاقستان وبلىسى اباي اۋدانىندا بوي كوتەرەتىن قۇنانباي مۋزەيىنىڭ قۇرىلىسى باستالدى، دەپ حابارلايدى قازاقپارات ءتىلشىسى.

بۇل جايلى ايماق باسشىسى دانيال احمەتوۆ ءوزىنىڭ Facebook-تەگى پاراقشاسىندا جازدى. «جۇمىس ساپارىمەن اباي اۋدانىندا بولدىم. ۇلى اقىننىڭ تۋعان جەرىندەگى «سىرت قاسقابۇلاق» ستەللاسىنىڭ قۇرىلىسىمەن تانىستىم. جۇمىستىڭ ءبىرىنشى كەزەڭى اياقتالدى. سونداي- اق اقشوقىدا قۇنانباي اۋلەتىنىڭ قورىمى جاڭارتىلىپ، مۋزەي قۇرىلىسى باستالدى. مۇنداعى باستى مىندەت - حاكىمنىڭ اتا- اناسىنا قۇرمەت كورسەتۋ. مۋزەي قازاق حالقىنىڭ قۇندىلىقتارى مەن ۇرپاقتار ساباقتاستىعىن ساقتاۋ تۇرعىسىنان وتە ماڭىزدى نىسان ەكەنىن ەرەكشە اتاپ وتكىم كەلەدى»، - دەدى اكىم. ونىڭ ايتۋىنشا، جيدەبايداعى مەموريالدىق كەشەندە دە اۋقىمدى جوندەۋ جۇمىستارى جۇرگىزىلۋدە.

«ءبىز بۇل كەشەندى تۇبەگەيلى جاڭارتساق تا، ونىڭ تاريحي، ساۋلەتتىك كەلبەتىن ساقتايمىز. اباتتاندىرىپ، جارىقتاندىرۋ جۇرگىزەمىز. مەملەكەت باسشىسى قاسىم- جومارت توقايەۆتىڭ تاپسىرماسىنا سايكەس، ابايدىڭ 175 جىلدىعىن اتاپ ءوتۋ ءبىزدىڭ داستۇرىمىزگە دەگەن قۇرمەت كورسەتۋ. سوندىقتان مۇندا حالىق اقىننىڭ شىعارماشىلىعىمەن تانىسىپ قانا قويماي، جاقسى دەمالىپ، ولكە، وتان تاريحىن زەرتتەۋگە مۇمكىندىك الادى»، - دەدى دانيال احمەتوۆ.

شىلدە ايىنىڭ سوڭىنا قاراي قاراۋىل اۋىلىنداعى 300 ورىندىق جاڭا مەكتەپتىڭ جانە دالا ساحناسى ورنالاساتىن ساياباقتىڭ قۇرىلىسىن اياقتالماق.

اۆتور: تالعاتجان مۇحامەتبەك ۇلى