الماتى وبلىسىندا بەس بالا كوروناۆيرۋستان جازىلدى
ونىڭ ىشىندە بەس بالا - 2 مەن 10 جاس ارالىعىندا، دەپ حابارلايدى قازاقپارات ءتىلشىسى الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
جازىلىپ شىققان پاتسيەنتتەردىڭ ءبىرى كەربۇلاق اۋدانىنىڭ تۇرعىنى. ەلدىمەكەننىڭ 34 جاستاعى تۇرعىنى، جۇكتى ايەل ءۇش بالاسىمەن ىندەتتەن ساۋىقتى. سونداي-اق ەڭبەكشىقازاق اۋدانىنىڭ 22 جانە 29 جاستاعى اعايىندى تۇرعىندارى دا كوروناۆيرۋستان جازىلدى.
سونىمەن قاتار، ەمدەلگەندەر قاتارىندا 29 جاستاعى كەلىنشەك پەن ءبىر وتباسىنىڭ ەكى بالاسى دا بار.
ولار ەڭبەكشىقازاق اۋدانارالىق كوپسالالى اۋرۋحانادا 16- ساۋىردەن باستاپ ەم العان بولاتىن.
ەڭبەكشىقازاق اۋدانارالىق كوپسالالى اۋرۋحانانىڭ باس دارىگەرى ءجاميلا ابەۋوۆا جۇكتى ايەلدىڭ جاعدايى ورتاشا اۋىر بولعانىن ايتادى.
«34 جاستاعى جۇكتى ايەل اۋرۋحاناعا پنيەۆمونيا دياگنوزىمەن تۇسكەن ەدى. جاعدايى ورتاشا اۋىر بولدى. دارىگەرلەر جۇكتى ايەلدى قاتاڭ باقىلاۋدا ۇستادى. جۇكتى ايەلدىڭ ءۇش بالاسىنان كوروناۆيرۋس ەكى كۇننەن كەيىن انىقتالدى. بالالارعا بەلگىلى الگوريتم بويىنشا ەم جۇرگىزىلدى. ەڭبەكشىقازاق اۋدانىنان تىركەلگەن ەكى بالا دا ءبىر وتباسىنىڭ بالالارى. قازىرگى ۋاقىتتا بارلىعىنىڭ دەنساۋلىعى جاقسى. الاڭداۋعا ەش نەگىز جوق»، - دەدى باس دارىگەر.
ەڭبەكشىقازاق اۋدانارالىق كوپسالالى اۋرۋحانادا ەمدەلگەن 9 پاتسيەنتكە 3- مامىر كۇنگى جاسالعان قايتا تالداۋ ناتيجەسى تەرىس ەكەنىن كورسەتتى. جالپى، الماتى وبلىسىندا كوروناۆيرۋستان جازىلعان ادامداردىڭ سانى 39 عا جەتتى.