قانداستار اراسىندا «اباي الەمى» حالىقارالىق بايقاۋى وتەدى
ۇلتىمىزدىڭ ۇلى تۇلعاسىنىڭ مەرەيتويىن مەملەكەت كولەمىندە جانە حالىقارالىق دەڭگەيدە لايىقتى اتاپ ءوتۋ ءۇشىن ەلىمىزدە ارنايى ۇكىمەتتىك كوميسسيا قۇرىلىپ، اۋقىمدى ءىس- شارالار جوسپارى ءتۇزىلدى
الايدا بۇگىندە بۇكىل الەمدى دەندەگەن دەرت - كوروناۆيرۋس ىندەتىمەن كۇرەسۋ ءۇشىن كۇللى جاھاندا، سونىمەن قاتار قازاقستاندا دا جاپپاي كارانتين جاريالانىپ، بارلىق سالادا جۇمىس ىستەۋ ءتاسىلىن كۇرت وزگەرتۋگە تۋرا كەلىپ وتىر.
وسىعان وراي دۇنيەجۇزى قازاقتارىنىڭ قاۋىمداستىعى مەن «وتانداستار قورى» ۇلتتىق سانانى ساقتاۋ جانە وي- ءورىسىمىزدى كەڭەيتىپ، وسكەلەڭ ۇرپاقتى رۋحاني تۇرعىدا دامىتۋ ماقساتىندا «اباي الەمى» حالىقارالىق بايقاۋىن وتكىزۋدى جوسپارلاپ وتىر.
بايقاۋ شارتتارى:
ءار قاتىسۋشى كەلەسى 5 قادامدى ورىنداۋ كەرەك:
1. اباي ولەڭدەرىنەن ءۇزىندى وقۋى (كەمىندە ەكى- ءۇش شۋماق) ؛
2. ابايدىڭ «قارا سوزدەرىنەن» ءۇزىندى وقۋى (كەمىندە ءبىر ابزاتس) ؛
3. اباي اندەرىنەن ءۇزىندى ورىنداۋى (كەمى ءبىر شۋماق+قايىرماسىمەن) كەرەك.
4. وسىنىڭ ءبارىن ءبىر ۆيدەوعا ءتۇسىرىپ، وزىنە ىڭعايلى الەۋمەتتىك جەلىگە (ينستاگرام، فەيسبۋك، ۆكونتاكتە، تۆيتتەر) سالىپ، #OtandastarAbai175 حەشتەگىن (مىندەتتى تۇردە) جازىپ جۇكتەۋى قاجەت.
5. ۆيدەونىڭ باسىندا اتى- ءجونىڭىزدى، قاي ەلدەن ەكەنىڭىزدى جانە جاسىڭىزدى ايتىپ جانە جازىپ قويۋ قاجەت.
بايقاۋعا كىم قاتىسا الادى؟
- الىس- جاقىن شەتەلدەگى قازاق جاستارى؛
- جاسى 18 بەن 35 ارالىعىندا بولۋى كەرەك.
بايقاۋدىڭ قورىتىندىسى:
1 - ماۋسىم - حالىقارالىق بالالاردى قورعاۋ كۇنىندە جاريالانادى.
بايقاۋ جەڭىمپازدارى:
بايقاۋعا جولدانعان بەينەروليكتەردى بىلىكتى مامانداردان قۇرىلعان قازىلار القاسى ىرىكتەپ- سۇرىپتاپ، ەڭ ۇزدىك دەپ تانىلعان 3 تالانتتى تالاپكەر جۇلدەگەر اتانادى؛
بارلىق 3 جۇلدەگەرگە دە «تۋعان ەلگە ساياحات» تۋريستىك پويىزىنا تەگىن جولداما بەرىلەدى؛
- ساياحات جاسايتىن ساپار ۋاقىتى قوسىمشا حابارلانىپ، جۇلدەگەرلەر الدىن الا قۇلاعدار ەتىلەدى؛
- ۇزدىك ۇشتىككە ەنگەن شەتەلدىك قانداستىڭ قازاقستانعا كەلىپ- كەتەتىن جول شىعىنىن، كۇتىپ الۋ- شىعارىپ سالۋ جانە تۋريستىك توپقا قوسۋ مىندەتىن «وتانداستار قورى» ءوز موينىنا الادى.
- ۇلى اقىننىڭ ۇلاعاتىن پاش ەتۋگە ارنالعان بايقاۋدا بارشاڭىزعا ساتتىلىك تىلەيمىز!