ق ر سىرتقى ىستەر مينيسترلى تۇركىستان وبلىسىنداعى جاعدايعا قاتىستى: وزبەكستانعا نوتا جولدانبايدى

نۇر- سۇلتان. قازاقپارات - تۇركىستان وبلىسىنىڭ ەلدى مەكەندەرىن سۋ باسۋعا قاتىستى وزبەك تاراپىنا ق ر سىرتقى ىستەر مينيسترلىگىنىڭ نوتاسىن جولداۋ ماسەلەسى قاراستىرىلمايدى.

بۇل تۋرالى ق ر س ءى م- ءنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات.

«وزبەكستان رەسپۋبليكاسى اۋماعىنداعى ساردوبا سۋ قويماسى بوگەتىنىڭ بۇزىلۋى جانە ونىڭ سالدارىنان تۇركىستان وبلىسىنىڭ ءبىرقاتار ەلدى مەكەندەرىن سۋ باسۋ بويىنشا جاعداي ءبىزدىڭ ۇكىمەتتىڭ ەرەكشە باقىلاۋىندا. ۇستىمىزدەگى جىلعى 2 -مامىردا قازاقستان پرەزيدەنتى قاسىم- جومارت توقايەۆ وزبەكستان پرەزيدەنتى شاۆكات ميرزيەيەۆپەن تەلەفون ارقىلى سويلەسكەنى جانە سۇحبات بارىسىندا تاراپتار ورىن العان جاعدايدى ناقتى تالقىلاپ، ەكى ەل ۇكىمەتى ۇيلەسىمدى جۇمىس اتقاراتىنى تۋرالى ۋاعدالاسقانى ءمالىم. سۋ باسۋ سالدارىن بىرلەسىپ جويۋ بويىنشا ۇكىمەت پەن شەكارالاس وڭىرلەر باسشىلارىنىڭ تىعىز ءوزارا ءىس- قيمىلىن نازارعا الا وتىرىپ، وزبەك تاراپىنا ق ر سىرتقى ىستەر مينيسترلىگىنىڭ نوتاسىن جولداۋ ماسەلەسى قاراستىرىلمايدى»، - دەدى ا. سمادياروۆ.

رەسمي وكىلدىڭ ايتۋىنشا، تۇركىستان وبلىسىنىڭ اكىمى ءومىرزاق شوكەيەۆ وزبەكستاننىڭ كورشىلەس وڭىرلەرىنە جەدەل تۇردە ساپار جاساعان. وزبەك تاراپىمەن قاجەتتى كەلىسسوزدەر جۇرگىزىپ، ونىڭ قورىتىندىلارى تۋرالى ۇكىمەتتىڭ بۇگىنگى وتىرىسىندا باياندادى.

«وزدەرىڭىزگە ءمالىم، پرەمەر- ءمينيستردىڭ ورىنباسارى رومان سكليار باستاعان ۇكىمەتتىك كوميسسيا قۇرىلدى. ەرتەڭ ول تۇركىستان وبلىسى مەن وزبەكستانعا بىرلەسكەن ءىس- قيمىل الگوريتمىن پىسىقتاۋ ءۇشىن بارادى. ەكى تاراپتىڭ بارلىق بايلانىستارى تولىقتاي ماڭگىلىك دوستىق جانە ستراتەگيالىق ارىپتەستىك تۋرالى شارتتاردىڭ جانە ترانسشەكارالىق سۋ اعىندارى مەن حالىقارالىق كولدەردى قورعاۋ جانە پايدالانۋ جونىندەگى كونۆەنتسيانىڭ نورمالارىنا سايكەس جۇزەگە اسىرىلادى»، - دەدى ول.

ەسكە سالايىق، وزبەكستاندا بوگەتتىڭ جارىلۋىنان تۇركىستان وبلىسىنىڭ بىرنەشە ەلدى مەكەنىن سۋ باستى. 31 مىڭنان استام تۇرعىن ەۆاكۋاتسيالاندى. اتقارىلعان جۇمىستاردان كەيىن سۋ باسۋ قاۋپى سەيىلگەن مىرزاكەنت، اقجول اۋىلدارىنىڭ 17 مىڭنان استام تۇرعىنى ۇيلەرىنە قايتا باستادى. بۇگىن تۇركىستان وبلىسىنىڭ اكىمى ءومىرزاق شوكەيەۆ ۇكىمەت وتىرىسىندا توتەنشە جاعداي سالدارىنان الدىن الا مالىمەت بويىنشا، 845 تۇرعىن ءۇيدى، 3 مەكتەپتى، 5 بالاباقشانى، 4 مەديتسينا نىسانىن، 1 مادەنيەتىن ءۇيىن، سونىمەن قاتار 10 دۇكەندى سۋ باسقانىن ءمالىم ەتتى. جەڭىس اۋىلىنداعى كوپىردى جانە رەسپۋبليكالىق، وبلىستىق، اۋداندىق ماڭىزى بار 54,7 شاقىرىم اۆتوموبيل جولى سۋ استىندا قالدى. مۇنان بولەك، الدىن الا جيناقتالعان مالىمەتتەرگە سايكەس، كولەمى 7 639 گەكتار ەگىستىك جەرىن سۋ شايدى. مال شىعىنى دا ناقتىلانىپ جاتىر. سونداي- اق وزبەكستان ماقتاارال اۋدانىنداعى بارلىق كوللەكتوردى تازالاۋعا كومەكتەسۋگە ۋادە ەتكەنى اتاپ ءوتىلدى. پرەمەر- مينيستر اسقار مامين زارداپ شەككەندەرگە ۇكىمەتتەن قاجەتتى بارلىق كومەك كورسەتىلەتىنىن ايتتى.