كارانتيندەگى جۇلدىز: قازاقستاندىق انشىلەر باتىرحان شۇكەنوۆتى ەسكە الدى
ونلاين كونتسەرتتە ءانشىنىڭ اڭىزعا اينالعان اندەرى شىرقالدى، دەپ حابارلايدى قازاقپارات ءتىلشىسى.
«ءسىز ەڭبەگىڭىز ارقىلى قۋانىش اكەلىپ، جىلۋ مەن جارىق ساۋلەسىن شاشساڭىز، ال ادامدار ونى سەزىنسە، ولاردىڭ ەنەرگياسى سىزگە ورالادى. مۇنىڭ ءوز ءمان-ماعىناسى بار. مەن ەفيردى ءدال وسى سوزدەرمەن باستاعىم كەلەدى، ويتكەنى ول بۇگىنگى ونلاين-كونسەرتتىڭ باستى كەيىپكەرى باتىرحان شۇكەنوۆكە ارنالادى»، - دەدى كەشتىڭ باسىندا ءانشى ءالي وقاپوۆ.
كەش قوناقتارى - روزا رىمبايەۆا، ساعىناي ابدۋللين، نادجيب ۆيلدانوۆ، رەنات گايسين، جانار دۇعالوۆا، رۇستەم نۇرجىگىت، دينايا، ءالي وقاپوۆ، سىرىمتاي ەڭسەپوۆ، جەڭىس نۇرعالي.
ارىپتەستەرى، دوستارى، مۋزىكانتتىڭ جاقىندارى ءانشى تۋرالى قىزىقتى ەستەلىكتەرىن ءبولىستى.
قازاق ەستراداسىنىڭ پريمادونناسى روزا رىمبايەۆا الماتىلىق مۋزىكانتتاردىڭ رەسمي ەمەس ءانۇرانىنا اينالعان «گاۆان موەي ليۋبۆي» ءانىن شىرقادى.
باتىرحان شۇكەنوۆتىڭ دوستارى مەن ارىپتەستەرى ارنايى بەينەۇندەۋ دايىندادى. ءانشى ساعىناي ابدۋللين، رەسەيلىك ەسترادا ءانشىسى يگور سارۋحانوۆ، تەلەجۇرگىزۋشى ءلايلا سۇلتان قىزى، رەسەيلىك ءانشى جانە كومپوزيتور لەونيد اگۋتين جانە تاعى دا باسقا تانىمال مۋزىكانتتار باتىرحان تۋرالى جىلى ەستەلىكتەر ايتتى.
«باتىرمەن ارالاسقاندا، ونىڭ جاقسى ادام ەكەنىن تۇسىنەسىڭ. ول وتە مەيىرىمدى جان جانە كاسىبي مامان. ءبىزدىڭ كاسىبي ەسترادامىزدا مۇنداي ادامدار وتە از. باتىرحاننىڭ جوقتىعى بىلىنەدى. ونىڭ ورنىن ەشكىم دە باسا المايدى. ءبىز ونى ۇمىتپاۋىمىز كەرەك. ول ءبىزدىڭ جۇرەگىمىزدە ماڭگى قالادى»، - دەدى لەونيد اگۋتين.
كونسەرت بارىسىندا مۋزىكانتتار باتىرحان شۇكەنوۆتىڭ «سولدات ليۋبۆي»، «تۆوي شاگي»، «كورابلي ليۋبۆي»، «وتپۋستي»، «گۇل الماتىم»، «وتان انا»، «ليۋبوۆ- رەكا»، «موليتۆا»، «نەليۋبيمايا»، «دجۋليا» جانە تاعى دا كوپتەگەن ءانىن ورىندادى.