ۇلاربەك نۇرعالىم ۇلى. كوڭىل ءشايى
كىسى قايتىس بولعان شاڭىراقتى جەتى كۇن وتەر- وتپەستە اينالا اۋىل بىرىنەن سوڭ ءبىرى ۇيىنە شاقىرىپ كوڭىل ءشايىن بەرەر ەدى. وسى كەزەڭدە قارالى ءۇيدىڭ ەستيار ادامدارىنىڭ ەشقايسىسى كوڭىل ءشايعا شاقىرماعان ءۇيدىڭ تابالدىرىعىن اتتاۋعا بولمايدى. ءتىپتى سول ۇيدەن الار ءزارۋ زاتى بولسا دا ءوزى بارماي، وزگە ادامدى جىبەرىپ الدىرادى. جاقىندارىنان ايىرىلىپ قامكوڭىل بولعان شاڭىراقتى شاقىرماي مىنا جۇرتتىڭ دا كوڭىلى جاي تاپپاق ەمەس. «قايعىنى سولاي بولىسەدى، كوڭىلدى سولاي ەمدەيدى» دەيدى ەكەن بىرەۋى، «قارالى جاندى قۇلازىتىپ ۇيىندە وتىرعىزۋعا بولمايدى، ۋايىمنىڭ ۋىسىنا تۇسىرمەي تەزىرەك باياعى تىرشىلىك ديىرمەنىنىڭ تىسىنە ءىلىپ جىبەرەمىز، ايتپەسە ىشكە كۇيىك ءتۇسىپ كەتۋى كادىك» دەيدى ەكەن تاعى بىرەۋى.
«قارالى ءۇيدىڭ بوساعاسىندا جىل ۋاعىنا دەيىن ارىستان جاتادى، ول ارىستان سول ءۇيدىڭ ادامدارىن سىرتتان بىرەۋ شاقىرسا عانا جىبەرەدى ەكەن، ارىستان دەگەنى سول قايعى شىعار» دەپ ءفالسافالايدى ەكەن ەندى ءبىرى. سونداي دا سونداي قانشاما قاعيدالارىن قالت جىبەرمەيتىن بۇل قاۋىمنىڭ ءبىر- ءبىرىنىڭ كوڭىلىن ەمدەر تالاي وقيعا كەيىپكەرلەرىنىڭ بەتىن بەيىت جاۋىپ قالسا دا اينالاڭدا ءتىرى جۇرگەندەي سەزىلەتىنى نەسى ەكەن؟ الدە بۇل ساعىنىش پا؟ الدە بۇل سەنىڭ دە اناۋ ءبىر جىلدارداعى ەمدەلمەي قالعان جارالى كوڭىلىڭنىڭ ەندى- ەندى ىزدەپ تاپقان ءدارىسى مە ەكەن؟ ويىڭا ورالا بەرەدى، ورالا بەرەدى.. .
سونااااۋ جىلدارى، تاعى دا سول قاۋىمدا، سول اۋىلدا جاسى سەكسەننەن اسقان حانيفا دەگەن اجە ءحال ۇستىندە جاتىپتى. شەكەسى تەرشىپ، الدەنەگە قىسىلعانداي ءجۇزى دە قىزارىپ، بىردەڭە ايتقىسى كەلگەندەي كەلىنىنە قاراعىشتاي بەرگەن ەكەن. كەلىنى قايقىباس توسەك الدىنا تىزەرلەي وتىرىپ ەنەسىنىڭ ەرنىنە قۇلاعىن توسەپتى. سوندا ءحال ۇستىندەگى حانيفا كەمپىر ءار ءسوزىن دەمىنە جالعاپ شىعارىپ جاتىپ:
- ان- اۋ نۇر- دان- داردى كوڭىل شاي- عا شاقىر- الما- عانى- مىز- اي، جاس ءول- ىم ەدى ع- وي، ەن- دى مە- نىڭ جانا- زاما قال- اي كەل- ەر ەك- ەن؟ - دەپ كۇرسىنىپتى.
سودان ءسال تىنىعىپ بارىپ، كوزىنىڭ جاسى ءمولت ەتىپ توگىلىپ كەتكەن كەلىنىنە قايتا ءبىر تىكتەپ قاراپ:
- الدى- مەن سول- ارعا كوڭ- ىل ش- ءاي بەر- ءىپ الى- پ، سو- دان كەي- ىن وزدەر- ىڭ بار- ار- سىڭدار عوي، ءجو- ءنى سو- لاي، - دەپ، وسيەتىن ايتىپ ۇلگەرگەنىنە جانى جاي تاپقانداي اقىرىن عانا سوزىلا ءتۇسىپ، ءۇزىلىپ كەتە بارعان ەكەن، جارىقتىق.. .
سولاي، سول اۋىلدا، سول قاۋىمدا ءالى كۇنگە قولعا ۇستالماعان، كوزگە كورىنبەگەن تەك قانا ءبىر- ءبىرىنىڭ كوڭىلدەرىن جالعاپ تۇراتىن ءبىر قۇپيا، سىرلى ءجىپ بار ەدى دەسەدى، ونى ولگەندەر تىرىلەرگە تاستاپ كەتىپ وتىراتىن دەيدى.. .