پوليتسيادان قاشقان لەكسۋس كولىگى اۋدارىلىپ قالدى - الماتى وبلىسى

تالدىقورعان. قازاقپارات - الماتى وبلىسىنىڭ قاراتال اۋدانىندا پوليتسيادان قاشقان جۇرگىزۋشى كولىگىمەن اۋدارىلىپ قالدى، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جۇرگىزۋشى 26- ساۋىردە كەشكە تالدىقورعان قالاسىنىڭ 27 جاستاعى تۇرعىنى «لەكسۋس-470» اۆتوكولىگىن ماساڭ كۇيدە باسقارىپ، «تالدىقورعان-ۇشتوبە» اۆتوجولىنىڭ 25-شاقىرىمىندا ورنالاسقان 1№ سانيتارلىق بەكەتتەن ءوتۋ كەزىندە پوليتسەيدىڭ زاڭدى تالابىن ورىنداماي، توقتاماستان وتە شىققان. ىزىنە تۇسكەن ءتارتىپ ساقشىلارىن كورگەن جۇرگىزۋشى قاراتال اۋدانىنا قاراستى ەسكەلدى اۋىلىنا بۇرىلعان.

اۋىلدان شىعا ول وبلىس ورتالىعىنا بەت العان. دەگەنمەن، 27-شاقىرىمعا جەتكەندە كولىگىنە يە بولا الماي، جول جيەگىنە اۋدارىلعان. جول-كولىك وقيعاسى سالدارىنان جۇرگىزۋشى مەن ونىڭ قىزى ءارتۇرلى دەنە جاراقاتتارىن الىپ، اۋرۋحاناعا جەتكىزىلدى.

ال، ونىڭ اۆتوكولىگى ارنايى تۇراققا قويىلدى. سوتقا دەيىنگى تەرگەۋ بارىسىندا جۇرگىزۋشىنىڭ ايەلى پوليتسياعا جۇبايى مەن قىزىنىڭ ءىز-ءتۇسسىز جوعالۋىنا بايلانىستى جازعان ءوتىنىشى بويىنشا اكەسى مەن قىزىنىڭ 2020-جىلدىڭ 15- قاڭتارىنان ىزدەۋدە جۇرگەنى انىقتالدى. دەنساۋلىعى قالپىنا كەلگەن سوڭ، كۇدىكتىگە قاتىستى بۇلتارتپاۋ شاراسى بويىنشا شەشىم قابىلداناتىن بولادى.

بيلىك وكىلىنە باعىنباۋ دەرەگى بويىنشا ق ر قىلمىستىق كودەكسىنىڭ 379-بابىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر.

بيلىك وكىلىنىڭ زاڭدى تالابىن ورىنداماعانى ءۇشىن كوزدەلەتىن قىلمىستىق جاۋاپكەرشىلىكپەن قاتار، كۇدىكتى ماساڭ كۇيدە كولىك قۇرالىن باسقارۋ، توتەنشە جاعداي ءتارتىبىن بۇزۋ جانە دەنساۋلىققا زيان كەلتىرگەن جول-كولىك وقيعاسىن جاساۋ دەرەكتەرى بويىنشا قولدانىستاعى اكىمشىلىك زاڭناماعا سايكەس جاۋاپ بەرەتىن بولادى.