باتىرحان شۇكەنوۆ اندەرىنىڭ دومبىرامەن سۇيەمەلدەنگەن كاۆەرى جاريالاندى
وسىعان بايلانىستى ەلورداداعى «قورقىت» ەتنو-فولكلورلىق ءانسامبلى ءانشىنىڭ شىعارمالارىنىڭ دومبىرامەن سۇيەمەلدەنگەن كاۆەر نۇسقاسىن جاريا ەتتى، دەپ حابارلايدى قازاقپارات.
«ءبىز ورتاق ىسكە ءوز ۇلەسىمىزدى قوستىق دەپ بىلەمىز. مۋزىكا وسى ءبىر قيىن كەزەڭدە ءبارىمىزدى بىرىكتىرەدى جانە بىزگە ءۇمىت بەرەدى. بۇل جولى كوپشىلىك اراسىندا تانىمال بولعان بىرنەشە ءانىن تاڭداپ الدىق»، - دەدى ۇجىمنىڭ كوركەمدىك جەتەكشىسى شولپان قورعانبەك.
باتىرحان شۇكەنوۆ 1962-جىلدىڭ 18- مامىردا قىزىلوردا قالاسىندا دۇنيەگە كەلگەن. مەكتەپ بىتىرگەننەن كەيىن لەنينگراد قالاسىنداعى (قازىرگى سانكت- پەتەربۋرگ) نادەجدا كرۋپسكايا اتىنداعى مادەنيەت ينستيتۋتىنا وقۋعا تۇسكەن.
وندا ءانشى ساكسوفوننىڭ وركەسترلىك بولىمىندە ەكى جىل ءبىلىم الادى. باتىرحان شۇكەنوۆ 1983-جىلى بۇكىلوداقتىق ەسترادا ارتىستەرى بايقاۋىنىڭ لاۋرەاتى اتاندى. ال 1985-جىلى باتىرحان شۇكەنوۆ الماتى مەملەكەتتىك كونسەرۆاتورياسىن ءبىتىردى. كەيىن ءانشى ايگىلى «A- Studio» توبىنىڭ ىرگەسىن قالادى.
ءانشى 2015-جىلدىڭ 28- ءساۋىر كۇنى ماسكەۋدە كوز جۇمدى. ايتا كەتسەك، نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ «قورقىت» ەتنو- فولكلورلىق ءانسامبلىنىڭ قۇرامىنداعى ارتىستەر قوبىز، قىل قوبىز، نارقوبىز، دومبىرا، سىرناي، ءمۇيىز سىرناي، شاڭقوبىز، جەتىگەن، شەرتەر، داۋىلپاز، ساز سىرناي، باس دومبىرا، سىبىزعى، سۋ اعاش، توقىلداق اسپاپتارىندا وينايدى.
كوكتەمدە «قورقىت» ءانسامبلى 75 شىعارمانى ءۇزىلىسسىز ورىنداپ، قازاقستاننىڭ گيننەسس رەكوردتار كىتابىنا ەنگەن بولاتىن.