شىعىس قازاقستانعا قىتايدا ساتىپ الىنعان مەديتسينا بۇيىمدارى جەتكىزىلدى
ش ق و اكىمى باسپا ءسوز قىزمەتىنىڭ مالىمەتىنە سۇيەنسەك، كەشە ساعات 18.20 دا مەديتسينا بۇيىمدارى تيەلگەن سالماعى 14 توننانى قۇرايتىن جۇك قىتايدان وسكەمەن اۋەجايىنا جەتكىزىلگەن.
ونىڭ ىشىندە 100 مىڭ ەكسپرەسس-تەست، 18 مىڭ قورعانىس كوستيۋمى، 80 مىڭ رەسپيراتور، 10 مىڭ دانا قورعانىس ماسكاسى بار.
وبلىس اكىمى دانيال احمەتوۆتىڭ ايتۋىنشا، مەديتسينالىق بۇيىمدار مەن ارنايى قۇرالداردى ساتىپ الۋ جانە تاسىمالداۋ «پارىز» قوعامدىق قورى ەسەبىنەن قارجىلاندىرىلعان.
تاۋارلاردى قىسقا مەرزىم ىشىندە ساتىپ الۋ قىتايلىق سەرىكتەس - شىنجاڭدىق «سان باو» ساۋدا-ونەركاسىپتىك كورپوراتسياسى ج ش س ارقاسىندا مۇمكىن بولدى. اتالمىش كومپانيا ش ق و تۇرعىندارى ءۇشىن ءوز ەسەبىنەن 10 ميلليون تەڭگەدەن استام سوماعا قوسىمشا Alena-310 ماركالى 2200 قورعانىس ماسكاسىن، سونداي-اق 200 مىڭ دانا قان الۋ ءۇشىن بىررەتتىك ينەلەر مەن گرادۋيرلەنگەن تامىزعىشتاردى جىبەرگەن.
«وسىلايشا، وبلىستىڭ بارلىق ينفەكتسيالىق، پروۆيزورلىق جانە وبسەرۆاتسيالىق ستاتسيونارلارىنىڭ قاجەتتىلىگى تولىعىمەن قامتاماسىز ەتىلەدى. ەكسپرەسس-تەستتەن الدىمەن ك ۆ ي- مەن كۇرەستە الدىڭعى شەپتە جۇرگەن ماماندار وتكىزىلەدى. ولار مەديتسينا، قۇقىق قورعاۋ جانە سانيتارلىق- ەپيدەميولوگيالىق ورگانداردىڭ قىزمەتكەرلەرى»، - دەلىنگەن اقپاراتتا.
«ەلباسى ۇندەۋىنە سايكەس جانە ەل پرەزيدەنتىنىڭ تاپسىرماسىن ورىنداۋ اياسىندا ءبىزدىڭ وبلىس قىسقا مەرزىمدە قىتايلىق ارىپتەستەرمەن ىنتىماقتاستىقتا قاجەتتى مەديتسينالىق بۇيىمدار مەن تاۋارلاردى ساتىپ الدى. بۇل ءبىزدىڭ جەرلەستەرىمىزدىڭ دەنساۋلىعى مەن ءومىرىن ساقتاۋ ءۇشىن الدىڭعى قاتاردا جۇمىس ىستەپ جۇرگەن مەديتسينالىق جانە سانيتارلىق-ەپيدەميولوگيالىق قىزمەت ماماندارىن COVID-19-دان قورعاۋ قۇرالدارىنىڭ قورىن قامتاماسىز ەتۋگە مۇمكىندىك بەرەدى»، - دەيدى ايماق باسشىسى.
تاۋارلاردى تيەپ جونەلتۋگە «Nur Otan» پارتياسىنىڭ ەرىكتىلەرى دە بەلسەندى تۇردە قاتىستى.
وبلىستىڭ قالالارى مەن اۋداندارىنا ارى قاراي تاراتۋ ءۇشىن مەديتسينالىق بۇيىمدار جۇمىلدىرۋ دايىندىعى باسقارماسىنىڭ قويماسىنا جەتكىزىلەدى.
