ەلوردا ماڭىنداعى قوسشى اۋىلىندا ءۇشىنشى كۇن قاتارىنان جارىق وشۋدە

كوكشەتاۋ. قازاقپارات - ءبىرقاتار كوپقاباتتى تۇرعىن ءۇي جارىقسىز قالعان اقمولا وبلىسىنىڭ قوسشى اۋلىندا اپاتتى جويۋ جۇمىستارى جۇرگىزىلۋدە، دەپ حابارلايدى قازاقپارات ءتىلشىسى وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

سەلينوگراد اۋدانى اكىمدىگىنىڭ مالىمەتىنشە، 22- ءساۋىر كۇنى كەشكى ساعات 19:23 تە «ا ر ە ك» ا ق ديسپەتچەرلىك قىزمەتىنە قوسشى اۋىلىنىڭ «لەسنايا پوليانا» شاعىن اۋدانىندا «سولتۇستىك» قوسالقى ستانتسياسىنان باستاپ، 3- تاراتقىش ترانسفورماتورلى قوسالقى ستانتسياسىنا دەيىنگى 10 ك ۆ كابەل جەلىسىندە اپات بولعانى تۋرالى حابارلانعان.

«قازىرگى كەزدە اپات ورنىندا ەلەكترومونتەرلەردىڭ ەكى بريگاداسى جۇمىس ىستەۋدە. ارنايى زەرتحانا كابەل جەلىسىنىڭ اپات بولعان تۇسىن انىقتادى. كابەل جەلىسىنىڭ بۇلىنگەن تۇسىن اۋىستىرۋ جۇمىستارى جۇرگىزىلۋدە. بىرەر ساعاتتا ەلەكتر ەنەرگياسىن بەرۋ جوسپارلانىپ وتىر»، - دەپ ءتۇسىندىردى وبلىس اكىمدىگىنىڭ باسپا ءسوز قىزمەتىندەگىلەر.

ۆەدومستۆو دەرەگى بويىنشا، ەلەكترمەن جابدىقتاۋ جۇيەسىنىڭ توزۋى سالدارىنان اتالمىش كابەل جەلىسىندە 19-21- ءساۋىر كۇندەرى دە اپات بولعان. الايدا، ول دەر كەزىندە جويىلعان.

«الداعى ۋاقىتتا ەلەكترمەن جابدىقتاۋ جۇيەسىنىڭ قالىپتى جۇمىس ىستەۋى ءۇشىن «لەسنايا پوليانا» شاعىن اۋدانىندا جاڭا ەلەكتر جەلىسىن سالۋعا جوبالىق-سمەتالىق قۇجاتتاما ازىرلەنگەن. قازىرگى كەزدە قۇرىلىس-مونتاجداۋ جۇمىستارى جۇگىزىلۋدە»، - دەپ تولىقتىردى اكىمدىكتەگىلەر.