ۋحان ناۋقاستارىنا «قارا جورعا» ءبيى قالاي كومەكتەستى

الماتى. قازاقپارات - الماتىدا قىتايدان كەلگەن دارىگەرلەر دەلەگاتسياسىنىڭ ونلاين ساباقتارى جالعاسىپ جاتىر، دەپ حابارلايدى قازاقپارات ءتىلشىسى.

بۇگىن پۋلمونولوگ دارىگەر سيۋ گاۋنفەڭ ناۋقاستارعا پسيحولوگيالىق كومەك كورسەتۋدىڭ ماڭىزدىلىعى تۋرالى ايتتى.

ونىڭ ايتۋىنشا، وقشاۋلانعان ادامدار جۇيكەسى جۇقارىپ، شارشايدى. سونىمەن قاتار ولاردىڭ ءجۇرىس-تۇرىسىنا تىيىم سالىنادى. سول ءۇشىن پاتسيەنتتەرمەن سويلەسىپ، جاتتىعۋ جۇرگىزىپ تۇرعان دۇرىس. قىتاي دارىگەرى مىسال رەتىندە قازاق دارىگەرىنىڭ «قارا جورعا» ءبيىنىڭ ۋحانداعى كوروناۆيرۋسپەن اۋىرعان ناۋقاستارعا قالاي كومەكتەسكەنىن ايتىپ بەردى.

«ناۋقاستارمەن ۆيدەوبايلانىس ارقىلى ساباق وتكىزىپ، ۇنەمى بايلانىستا بولعان ءجون. ءار پاتسيەنتپەن جەكە كۇنىنە 2 رەت تىنىس الۋ جۇيەسىن جاقسارتاتىن جاتتىعۋ جاساپ، بي بيلەۋ كەرەك. بىزدە مودۋلدى اۋرۋحانالاردىڭ بىرىندە ۇلتى قازاق دارىگەرلەردىڭ ءبىرى «قارا جورعا» ءبيىن بيلەۋدى ۇيرەتتى. بۇل پاتسيەنتتەردى ەموتسيالىق جاعىنان دا، فيزيكالىق جاعىنان دا ءبىر سەرپىلتىپ تاستاعانى راس. وسى بيدەن كەيىن پاتسيەنتتەردىڭ كوپشىلىگى ءبىرازعا دەيىن ەڭسەلەرى تىك، كوتەرىڭكى كوڭىل كۇيمەن ءجۇردى»، - دەدى دارىگەر تسيۋ گاۋنفەڭ.

ايتا كەتۋ كەرەك، الماتىدا قىتاي دارىگەرلەرىنىڭ ونلاين ساباقتارى جالعاسىپ جاتىر.

اۆتور: گۇلميرا عوسمانالي