الماتىدا پوليتسەيلەرمەن جاعا جىرتىسقان ازاماتتار قاماۋعا الىندى

الماتى. قازاقپارات - الماتىدا پوليتسەيلەرمەن جاعا جىرتىسقان ادامدار قاماۋعا الىندى، دەپ حابارلايدى قازاقپارات ءتىلشىسى قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

پوليتسيانىڭ حابارلاۋىنشا، 1990- جانە 1992-جىلى تۋعان، سونداي-اق 1986-جىلى تۋعان ازاماتتارعا قاتىستى ق ر ق ك 380-بابىندا (بيلىك وكىلىنە قاتىستى كۇش قولدانۋ) جانە ق ر ق ك 378-بابىندا كوزدەلگەن قىلمىس بەلگىلەرى بويىنشا (بيلىك وكىلىن قورلاۋ) بويىنشا قىلمىستىق ىستەر تەرگەلۋدە.

«ءۇش كۇدىكتى قاماۋعا الىندى. ا. ەسىمدى ازامات پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى. سونىمەن قاتار، 1992-جىلى تۋعان ل. ەسىمدى ازامات توتەنشە جاعداي كەزىندە ءتارتىپ بۇزىپ، زاڭعا قايشى ارەكەتتەرى ءۇشىن ايىپتالدى، ق ر ا ق ب ت ك 478-بابىنا سايكەس، 20 تاۋلىككە اكىمشىلىك قاماۋعا الىندى»، - دەلىنگەن حابارلامادا.

اكىمشىلىك قاماۋعا الۋ اياقتالعاننان كەيىن ل. ەسىمدى ازامات قىلمىستىق ءىس شەڭبەرىندە ق ر ق ى ج ك 128-بابى نەگىزىندە پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى.

«الەۋمەتتىك جەلىدە بۇعان دەيىن تارالعان جازبانىڭ اۆتورى 1986-جىلى تۋعان ب. ەسىمدى ازامات بيلىك وكىلىن جاريا قورلاۋ فاكتىسى بويىنشا جاۋاپقا تارتىلدى»، - دەپ حابارلادى پوليتسيادا.

ەسكە سالساق، الماتىدا پوليتسيا قىزمەتكەرى مەن بالا سەرۋەندەتىپ جۇرگەن ەر ادام جاعا جىرتىسقان ۆيدەوسى الەۋمەتتىك جەلىلەردە تاراپ، قىزۋ تالقىلانعان بولاتىن.