وڭىرلەردە انىقتالعان كوروناۆيرۋستىڭ جاڭا جاعدايلارى تۋرالى مالىمەت

نۇر- سۇلتان. قازاقپارات - قىزىلوردا، اتىراۋ جانە تۇركىستان، پاۆلودار وبلىستارىندا كوروناۆيرۋس ىندەتىن جۇقتىرۋدىڭ جاڭا جاعدايلارى ناۋقاس ادامدارمەن بايلانىستا بولعاندار اراسىندا انىقتالدى، دەپ حابارلايدى قازاقپارات.

بۇعان دەيىن حابارلاعانىمىزداي، 10- ءساۋىر ساعات 20.15 تەگى جاعداي بويىنشا، قازاقستاندا ينفەكسياعا شالدىعۋدىڭ جاڭادان 6 وقيعاسى تىركەلدى. ونىڭ ىشىندە الماتى قالاسىندا – 1، پاۆلودار وبلىسىندا – 1، اتىراۋ وبلىسىندا – 2، قىزىلوردا وبلىسىندا – 1، تۇركىستان وبلىسىندا 1 ادام انىقتالدى. مەملەكەتتىك كوميسسيانىڭ شۇعىل شتابىنان ءمالىم ەتكەندەي، قىزىلوردا وبلىسىندا كوروناۆيرۋس ينفەكسياسىن جۇقتىرعان 49 جاستاعى ناۋقاس سىرداريا اۋدانى، امانگەلدى اۋىلىنىڭ تۇرعىنى. ول ىندەتكە شالدىققان اداممەن قارىم- قاتىناستا بولعان. سوعان بايلانىستى ودان زەرتحانالىق سىنامالار الىنىپ، COVID-19 دياگنوزى راستالعان. قازىرگى تاڭدا بەكىتىلگەن حاتتاماعا سايكەس ەم جۇرگىزىلۋدە.

سوڭعى رەسمي مالىمەتكە سايكەس، قىزىلوردا وبلىسىندا ىندەتتى جۇقتىرعان 105 ادام بار. اتىراۋ وبلىسىندا COVID-19 2 ادامنان انىقتالدى. ەكەۋى دە اتىراۋ قالاسىندا تىركەلدى. ولار بۇعان دەيىن ناۋقاسپەن قارىم- قاتىناستا بولعان. «ولاردان زەرتحانالىق سىنامالار الىنىپ، پ ت ر دياگنوستيكالىق زەرتتەۋ ناتيجەلەرى بويىنشا COVID-19 دياگنوزى انىقتالدى. ولار جۇقپالى اۋرۋلار اۋرۋحاناسىنا جاتقىزىلدى. جاعدايلارى قازىر قاناعاتتانارلىق، بەكىتىلگەن حاتتاماعا سايكەس ەم الۋدا. ناۋقاستارمەن قارىم- قاتىناستا بولعان ادامدار انىقتالىپ، بارلىعى مەديتسينالىق باقىلاۋعا الىندى. اۋرۋ وشاقتارىندا ەپيدەميولوگيالىق تەكسەرۋ، دەزينفەكتسيالىق جۇمىستار جۇرگىزىلىپ جاتىر» ، - دەلىنگەن مەملەكەتتىك كوميسسيانىڭ شۇعىل شتابىنىڭ اقپاراتىندا.

سوڭعى دەرەكتەرگە سايكەس، اتىراۋ وبلىسىندا COVID-19 بارلىعى 47 ادامنان انىقتالدى. سونداي- اق ينفەكتسياسىن جۇقتىرعان تاعى 1 ادام تۇركىستان وبلىسىندا تىركەلدى.

«ارىس قالاسىنىڭ تۇرعىنى ۆيرۋس جۇقتىرعان اداممەن تىعىز قارىم- قاتىناستا بولۋىنا بايلانىستى كارانتيندىك ستاتسيونارعا جاتقىزىلعان. ق ر باس مەملەكەتتىك سانيتارلىق دارىگەردىڭ قاۋلىسىنا سايكەس زەرتحانالىق سىنامالار الىنىپ، دياگنوز ناقتىلاندى. قازىرگى تاڭدا جاعدايى قاناعاتتانارلىق. بەكىتىلگەن حاتتاماعا سايكەس ءتيىستى ەم جۇرگىزىلۋدە. ناۋقاسپەن قارىم- قاتىناستا بولعان ادامدار انىقتالىپ، بارلىعى مەديتسينالىق باقىلاۋعا الىنۋدا. اۋرۋ وشاقتارىندا ەپيدەميولوگيالىق تەكسەرۋ، دەزينفەكتسيالىق جۇمىستار جۇرگىزىلىپ جاتىر» ، - دەدى مەملەكەتتىك كوميسسيانىڭ شۇعىل شتابىنان.

وسى ۋاقىتتا تۇركىستان وبلىسىندا COVID-19 ىندەتىنىڭ راستالعان 35 وقيعاسى بار: جەتىسايدا – 14، ورداباسىدا – 2، سايرامدا – 2، ماقتاارالدا – 4، سارىاعاشتا – 1، كەنتاۋدا – 5، ارىستا - 7 ادام. پاۆلودار وبلىسىندا جاڭادان تىركەلگەن ناۋقاس جەدەل جاردەم قىزمەتىنىڭ فەلدشەرى ەكەنىن بۇعان دەيىن جازعان بولاتىنبىز. ول قايتىس بولعان سىرقات اداممەن بايلانىستا بولعان. 10 -ءساۋىر ساعات 20.15 تەگى سوڭعى مالىمەت بويىنشا، قازاقستاندا ىندەتكە شالدىققاندار سانى 808 گە جەتتى.