قارتتار ۇيىنەن شىققان كوروناۆيرۋس: بارلىق قىزمەتكەردەن سىناما الىندى

نۇر- سۇلتان. قازاقپارات – ق ر دەنساۋلىق ساقتاۋ مينيسترلىگى قوعامدىق دەنساۋلىق دەپارتامەنتىنىڭ ديرەكتورى ماعريپا ەمبەرگەنوۆا اقمولا وبلىسىنداعى قارتتار ۇيىنەن شىققان كوروناۆيرۋس جاعدايىنا قاتىستى مالىمەتتەرمەن ءبولىستى، دەپ حابارلايدى قازاقپارات ءتىلشىسى.

«اقمولا وبلىستىق الەۋمەتتىك باعدارلامالاردى ۇيلەستىرۋ جانە جۇمىسپەن قامتۋ باسقارماسىنىڭ «شاپاعات» ارناۋلى الەۋمەتتىك قىزمەتتەر كورسەتۋ ورتالىعى سەلينوگراد اۋدانىنا قاراستى اققايىڭ اۋىلىنا ورنالاسقان. 16 -ناۋرىزدا، كارانتين جاريالانعان ساتتە بۇل ورتالىقتا قامقورلىققا الىنعان 148 ادام بولعان. ورتا جاستارى - 75 جاستى قۇرايدى. قىزمەت كورسەتەتىن 74 ادامنىڭ ىشىندە 51 قىزمەتكەر ەڭبەك دەمالىسىنا جانە قاشىقتان جۇمىس ىستەۋگە جىبەرىلگەن. وكىنىشكە وراي، 2 - ساۋىردە 1947 -جىلى دۇنيەگە كەلگەن، ال 6 - ساۋىردە 1929 -جىلى دۇنيەگە كەلگەن قامقورلىققا الىنعان ادام قايتىس بولدى» ،- دەدى ول ورتالىق كوممۋنيكاتسيالار قىزمەتىندەگى بريفينگتە. ونىڭ اتاپ وتۋىنشە، قازا بولعان ەكى ادامنان دا كوروناۆيرۋس بەلگىلەرى بايقالماعان. ولاردىڭ ىندەت جۇقتىرعانى قايتىس بولعاننان كەيىن انىقتالعان.

«جوعارىدا ايتىلعان جايتتارعا بايلانىستى اقمولا وبلىستىق تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتى سانيتارلىق- ەپيدەميولوگيالىق تەكسەرۋ جۇرگىزىپ، بايلانىستا بولعان ادامدار اياسى انىقتالدى، كوروناۆيرۋستى انىقتاۋعا ارنالعان زەرتحانالىق زەرتتەۋلەر جۇرگىزىلدى. ۆيرۋس جۇقتىرعاندارمەن بايلانىستى بولۋىنا وراي ورتالىقتىڭ بارلىق قىزمەتكەرلەرىنەن سىناما الىندى»، - دەدى ماعريپا ەمبەرگەنوۆا.