قىتاي دارىگەرلەرى ەلىمىزدەگى كارانتين شارالارىن وڭ باعالادى

نۇر- سۇلتان. قازاقپارات - قاۋىپتى ىندەت كەڭ تاراماۋى ءۇشىن كارانتين شاراسىنىڭ ماڭىزى زور. قىتايدىڭ شىڭجاڭ وڭىرىنەن كەلگەن دارىگەرلەر وسىلاي دەيدى.

تىيىم جانە شەكتەۋ شارالارى حالىققا قولايسىزدىق تۋدىرعانىمەن، ينفەكسيامەن كۇرەسۋ ءۇشىن قاجەت. كورشى ەلدەن كەلگەن مامانداردىڭ ايتۋىنشا، قىتاي ەلى قاتاڭ ءتارتىپ پەن كارانتينىڭ ناتيجەسىندە جاعدايدى تۇراقتاندىرا الدى، دەپ حابارلايدى «حابار 24».

قىتاي ەلىنەن 10 دارىگەر كەلگەن ەدى. ولار ءبىزدىڭ ماماندارعا كەڭەس بەرىپ، تاجىريبەمەن بولىسەدى. قىتايدىڭ ينفەكسيونيست دارىگەرى لۋ سياوبو ۆيرۋس جۇقتىرعان ادامدى جەدەل انىقتاۋ ماڭىزدى ەكەنىن ايتادى. سونداي- اق سىرقاتپەن بايلانىستا بولعان ادامداردى ۋاقىت وزدىرماي كارانتينگە جاتقىزۋ قاجەت. ال، دارىگەرلەر ينفەكسيا جۇقتىرماس ءۇشىن ساقتىق شارالارىن كۇشەيتۋ كەرەك. جالپى قىتاي دارىگەرلەرى قازاقستاندا كارانتين كەزىندە جاسالىپ جاتقان ءىس- شارالاردى جوعارى باعالادى.

لۋ چەن، ق ح ر شىڭجاڭ اۆتونومدىق رەسپۋبليكاسى حالىق اۋرۋحاناسى باس دارىگەرىنىڭ ورىنباسارى:

- ۋحان قالاسىندا اۋرۋ العاش شىققان كەزدە 3387 دارىگەر اۋرۋ جۇقتىرىپ العان ەدى. كەيىن ولاردى ارنايى قورعانىش قۇرالدارىمەن تولىق جابدىقتاپ، ساقتانۋ شارالارىن وقىتتىق. كەيىن دارىگەرلەردىڭ جۇقتىرۋ دەرەگى ازايدى. جالپى قاتاڭ شارالار قولدانۋ ارقىلى ينفەكسيانىڭ تارالۋىنىڭ الدىن الۋعا بولادى. نۇر- سۇلتاندا كولىك جۇرگىزۋشىلەرىنە دەيىن بەتپەردەمەن ءجۇر. بۇل وتە دۇرىس.