توقايەۆ ت ج رەجيمىنىڭ سوزىلۋ سەبەبىن ءتۇسىندىردى

نۇر- سۇلتان. قازاقپارات - پرەزيدەنت قاسىم- جومارت توقايەۆ ەلىمىزدە توتەنشە جاعداي رەجيمىن نە ءۇشىن ءساۋىردىڭ اياعىنا دەيىن سوزۋدى تاپسىرعانىن ءتۇسىندىردى، دەپ حابارلايدى قازاقپارات ءتىلشىسى.

«ادامدار قازىر كوشەگە شىققىسى كەلەدى. كۇندەلىكتى قالىپتى ومىرىنە قايتۋعا نيەتتى. ءبىراق كارانتين مەن ءوز- ءوزىمىزدى وقشاۋلاۋدان باسقا امال دا جوق. بۇل - وتاندىق جانە حالىقارالىق ۆيرۋسلولوگ- مامانداردىڭ كەڭەسى. باسقا جاعدايدا ءبىز جاعدايدى ۋشىقتىرىپ الامىز. ەپيمەديا جاپپاي ەلىمىزدى جايلاعانىمەن قويماي، بۇكىل تۇتاس ۇلتتىق دەنساۋلىعىنا قاۋىپ تونەدى. ونىمەن قوسا ۇلتتىق قاۋىپسىزدىككە دە قاتەر كەلەدى. ولاي بولسا شاعىن جانە ورتا بيزنەس، ءتىپتى ەكونوميكانى ساقتاپ قالۋدىڭ ءوزى كۇن تارتىبىندە ماڭىزىن جوعالتارى انىق»، - دەدى قاسىم- جومارت توقايەۆ توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ وتىرىسىندا.

«جۇمىسپەن قامتۋ جول كارتاسى» باعدارلاماسىنا بولىنگەن قوماقتى قارجى قۇمعا سىڭگەندەي جوق بولماۋى ءتيىس.

«حالىقتى جۇمىسپەن قولداۋ ءۇشىن «جۇمىسپەن قامتۋ جول كارتاسى» باعدارلاماسى قابىلداندى. ونىڭ اياسىندا ۆيرۋستان كەيىنگى كەزەڭدە شامامەن 240 مىڭ جۇمىس ورنى قۇرىلادى. ونى جۇزەگە اسىرۋعا تەڭدەسسىز سوما (1 تريلليون تەڭگەگە دەيىن) بولىنەدى. بۇعان دەيىن بىرنەشە رەت ورىن العانداي، بولىنگەن قارجىنىڭ قۇمعا ءسىڭىپ كەتپەۋى بارىنشا ماڭىزدى. سوندىقتان ۇكىمەت پەن اكىمدەر قازاقستاندىق كادرلاردى، وتاندىق قۇرىلىس كومپانيالارى مەن قۇرىلىس ماتەريالدارىن وندىرۋشىلەردى تارتۋى ماڭىزدى»، - دەدى مەملەكەت باسشىسى.

وسى رەتتە ق ر پرەزيدەنتى جوسپارلانعان جۇمىس ورىندارىنىڭ باسىم بولىگى ۋاقىتشا ەكەندىگىنە باسا نازار اۋداردى. «باعدارلاما اياقتالعاننان كەيىن تۇراقتى جۇمىسپەن تەك قانا 13 مىڭ ادام قامتاماسىز ەتىلەتىن بولادى. ءبىرقاتار وڭىردە باعدارلاما قورىتىندىسى بويىنشا تۇراقتى جۇمىس ورىندارىنىڭ ساۋساقپەن سانارلىقتاي سانىن قۇرۋ جوسپارلانعان. جۇمىسپەن قامتۋدىڭ ەكى ءتۇرى اراسىنداعى بالانستى قامتاماسىز ەتۋ قاجەت. داعدارىس كەزىندە ۋاقىتشا جۇمىسقا ورنالاسۋ ماڭىزدى. ءبىراق، بارىنشا كەڭ ءارى ساپالى جۇمىس ورىندارىنىڭ كەلەشەگى جايىندا دا ويلاۋ قاجەت»، - دەدى ق. توقايەۆ.